SHBA nxit Europën të ndjekë linjë të ashpër me Iranin

Sekretari amerikan i Shtetit, Mike Pompeo, të enjten ka nxitur kombet europiane që të bëhen të ashpra ndaj Iranit, duke shkurtuar të gjitha fondet që vendi mund të përdorë për të nxitur paqëndrueshmëri në Lindjen e Mesme dhe më gjerë. Pompeo u takua me zyrtarët europianë në Bruksel, pas një takimi të liderëve të NATO- s, për të ngritur çështjen e “terrorizmit dhe luftërave e autorizuara” iraniane. Ai u bëri thirrje vendeve europiane të bashkohen me një fushatë presioni ekonomik të udhëhequr nga Shtetet e Bashkuara kundër Teheranit, që filloi me zell, pasi Presidenti Donald Trump u tërhoq nga marrëveshja bërthamore iraniane, në maj. “Nuk mund të thuhet kur Irani mund të përpiqet të nxisë terrorizmin, dhunën dhe paqëndrueshmërinë në një nga vendet tona”, ka shkruar Pompeo në “Twitter”, një mesazh i shoqëruar nga një hartë që akuzon Iranin për sponsorizimin e të paktën 11 sulmeve terroriste në Europë, që nga viti 1978. Po ashtu ai akuzoi Iranin se shkel rezolutat OKB, duke dërguar armë në vende të caktuara në Lindjen e Mesme. Pompeo kujtoi se javën e kaluar një diplomat iranian u akuzua se po organizonte një komplot në Paris, Francë. Qeveria iraniane e ka mohuar përfshirjen në një incident të tillë, duke e quajtur atë të sajuar. Thirrjet nga SHBA për një politikë të ashpër ndaj Iranit, vijnë në një kohë kur Presidenti i Iranit, Hassan Rouhani, ka nisur një vizitë në Europë dhe kur BE dhe fuqi të tjera botërore po përpiqen të mbajnë në fuqi marrëveshje nukleare të Iranit.