Vetingu, Ndreca probleme me pasurinë dhe figurën
KPK: Gjyqtari i Gjykatës së Lartë ka k ontakte të papërshtatshme
Karriera e gjatë e gjyqtarit të Gjykatës së Lartë Tom Ndreca u trondit ditën e djeshme në Komisionin e Pavarur të Kualifikimit, teksa hetimi administrativ gjeti një sërë problemesh në pasurinë e tij.
Jo vetëm kaq. Sipas KPKsë, gjyqtari Ndreca ka kontakte të papërshtatshme, të cilat i ka fshehur duke mos i deklaruar në formularin e DSIK- ut. Ndreca, me një karrierë të gjatë në gjyqësor, ushtron detyrën e anëtarit të Gjykatës së Lartë që prej vitit 2013. Ai ishte i pranishëm ditën e djeshme në seancë, së bashku me avokaten Mine Progonati. Trupa gjykuese përbehej nga Brunilda Bekteshi kryesuese, relatore Firdes Shuli dhe anëtar Roland Ilia. Relatorja e çështjes theksoi se hetimi administrativ për gjyqtarin Tom Ndreca është bazuar në dy kritere, atë të pasurisë dhe të integritetit të figurës. Që në fillim, relatorja theksoi se raporti i ardhur nga ILDKPKI- ja e ka nxjerrë pa probleme gjyqtarin Ndreca. Mirëpo, hetimi administrativ i KPK- së thotë ndryshe. Në sitën e vetingut kaluan: një apartament 120 metra katrorë, i blerë për 2.4 milionë lekë, së bashku me një garazh 18 metra katrorë, i blerë për 470 mijë lekë në Tiranë. Si burim për blerjen e këtij apartamenti ka shërbyer shitja e një apartamenti në Rrëshen dhe kursimet nga paga; një apartament 74 metra katrorë në Golem, i blerë për 31 mijë euro me burime kursimet nga paga; një apartament 93 metra katrorë, i blerë për 6 milionë lekë në Tiranë; një automjet “Golf” i blerë për 200 mijë lekë, kursime kesh në vlerën 1.5 milionë lekë; depozitë bankare në emër të bashkëshortes në shumë 3 milionë lekël; depozitë në emër të djalit në vlerë 1 milionë lekë dhe llogari rrjedhëse në emër të gjyqtarit në vlerën 1.2 milionë lekë. Sipas relatores Shuli, KPK- js ka konstatuar deklarata kontradiktore në lidhje me apartamentin 120 metra katrorë. Gjyqtari nuk ka deklaruar garazhin, një automjet që ka blerë i biri në vitin 2005 dhe nuk justifikon kursimet kesh në vlerën 1.5 milionë lekë. Gjyqtari Ndreca është justifikuar për mospërputhjet në deklarata, duke thënë se nuk ka pasur pasuri të fshehura. Ai tha se KPK- ja nuk ka llogaritur të ardhurat nga pagat për vitet 1980- 2003. “Dua t’ju kujtoj se unë e kam përfunduar shkollën në vitin 1979 dhe që nga ajo kohë kam punuar”, tha Ndreca në seancë, pa dhënë ndonjë shpjegim shumë të qartë. INTEGRITETI I FIGURËS
Sa i përket kriterit të integritetit të figurës, KPK- ja vlerëson se gjyqtari Tom Ndreca nuk ka plotësuar me saktësi formularët për DSIK- un. Ai, sipas komisionit, nuk ka deklaruar në këta formularë kontaktet me kunatin e tij, i cili është arrestuar vite më parë me 0.4 gramë kanabis sativa. Pas arrestimit, sipas KPK- së, Policia gjeti 6 kg kanabis në banesën e kunatit të gjyqtarit, mirëpo, hetimet për të u pushuan, pasi “nuk pati prova që droga i përkiste atij”. Sipas relatores Shuli, Ndreca e ka ditur këtë fakt dhe nuk e ka deklaruar në formularin e pastërtisë së figurës. Por gjyqtari Tom Ndreca dhe avokatja e tij pretenduan se nuk e kanë fshehur këtë fakt, pasi nuk e kanë pasur detyrim për ta deklaruar. Ai u pyet nëse kishte pasur dijeni për nisjen e procedimit penal për kunatin, por gjyqtari tha se nuk e dinte se çështja kishte përfunduar në Prokurori. Avokatja e tij tha se KPK- ja ka bërë interpretim të gabuar, sepse kunati i gjyqtarit nuk mund të konsiderohet person që vjen nga krimi i organizuar. Gjyqtari, në fund të seancës kërkoi nga KPK- ja që të rikonfirmohej në detyrë, duke parashtruar edhe një analizë paralele të likuiditeteve të tij. Seanca e vendimit do të mbahet më 17 korrik në orën 15: 00.