A ia ka dalë Rama të fitojë mbështetjen e Presidentit Trump?
Samiti i NATO- s, që u mbajt këto ditë në Bruksel, pati si temë qendrore nivelin e shpenzimeve që duhet të përmbushi secili nga vendet...
anëtare. Presidenti Donald Trump u kërkoi vendeve të rëndësishme, si Gjermani ( sidomos Gjermanisë ), Francë dhe Britani e Madhe që të përmbushin detyrimet e tyre. Presidenti Trump tha se Gjermania, duke hequr dorë nga burimet e veta energjetike të qymyrit dhe atyre nukleare dhe duke marrë 60- 70 të energjisë së saj nga Rusia, është e varur nga Rusia, ndërkohë që SHBA dhe NATO shpenzojnë për mbrojtjen e saj. Kjo është një temë, në të cilën Shqipëria nuk mund të ketë kurrë një rol. Kryeministri shqiptar, që përfaqëson vendin në këtë samit, nuk mund të ketë kurrë një zë në diskutime të tilla. Në mediat e mëdha të botës u zhvilluan debate mbi temën, mbi gjuhën e drejtpërdrejtë të Presidentit Trump mbi të ardhmen e NATO- s . Vetë liderët e rëndësishëm të NATO- s u përfshinë në këto diskutime. Është normale që drejtuesit e vendeve të vogla dhe pa asnjë ndikim në politikat e NATO- s si Shqipëria, Estonia, Sllovakia, Islanda etj., të rrinë të heshtura , të shohin mundësinë që në samite të tilla të zhvillojnë takime pune, pa lidhje me axhendën e samitit, me kryetarë shtetesh apo kryeministra vendesh anëtare që janë aty.
Kryeministri shqiptar Edi Rama, ditën e parë të samitit u hodhi si tagji mediave dhe shqiptarëve duke publikuar një foto me Presidenten kroate Kitaroviç. Askush nuk e di se ç’kërkon të tregojë Kryeministri me një foto të tillë . Ndoshta shpreh kënaqësinë për fitoren e Kroacisë ndaj Anglisë në futboll, por kjo nuk ka asnjë lidhje me takimet në NATO apo me interesin e shqiptarëve. I bie thjesht ka dashur të tregojë që është.... Ditën e dytë, Kryeministri Rama iu hodhi mediave një foto me Presidentin Trump. Ditën e tretë, nëpërmjet ministres së Mbrojtjes Olta Xhaçka, ai i tha medias se mbajti një fjalim në një darkë, fjalim të cilin e vlerësoi vetë Presidenti Trump.
Provincializmi është gjendje mendore e një njeriu, i cili fokusohet në gjëra të vogla, në pamundësi për të parë gjerë dhe në një kontekst më të madh. Një njeri me këtë mendje ndodh që ka vlerësim të dobët për veten, ka dyshime për atë që është dhe mendon vazhdimisht se nuk është në lartësinë e duhur ose nuk po kap nivelin, në të cilin janë të tjerët. Dhe për ta bërë këtë gjë, ai merret me gjëra të vogla, pa substancë, kot dhe përpiqet të bindë veten dhe të tjerët se ai është lart, është i vlerësuar, atë e shohin dhe dëgjojnë etj.
Fotoja e takimit me Presidentin Trump është një gjë pa vlerë , është një mashtrim i vetes dhe i të tjerëve se takimi me Trump- in tregon diçka, tregon se ai të vlerëson, tregon se ai të mbështet. Kjo është qesharake. Fotoja me Presidentin është bërë në korridor apo holl dhe nuk ka asnjë domethënie. Në samitin e NATO- s shtypi botëror u fokusua te disa pamje, ku Presidenti Trump duke i kaluar pranë i nxjerr si pa dashje bërrylin liderit të Malit të Zi, Gjukanoviç. Shtypi botëror u fokusua edhe te disa pamje, teksa Presidenti Trump dëgjonte krejt indiferent, duke mos e kthyer fare kokën nga Kryeministri Rama, i cili po i fliste gjithë duar, teksa ai ishte i ulur në një tavolinë . Ndërsa fjalimi që ka mbajtur Kryeministri Rama dhe që qenka vlerësuar nga Presidenti Trump, është shenjë edhe më e thellë provincializmi. Për çfarë mund të flasë Kryeministri shqiptar para liderëve të NATO- s, kur tema dhe shqetësimi themelor i samitit ishte kërcënimi i SHBA- së se, po nuk u përmbush niveli i shpenzimeve nga Gjermania dhe vendet e mëdha, edhe SHBA- ja mund të ikë nga NATO? Shqipëria e Kryeministri Rama, që nuk ka 20 milionë euro të ndërtojë një Teatër Kombëtar ( siç thotë vetë ai), nuk mund të flasë për rritjen deri në 34 miliardë euro të shpenzimeve të Gjermanisë, as për masat që mund të marrë Presidenti Trump dhe NATO për kërcënimin rus apo rreziqet e tjera të sigurisë.
Le të shohim pak a kishte ndonjë kryeministër apo kryetar shteti, që u dërgoi mediave foto me Presidentin Trump si shenjë mbështetjeje dhe a kishte ndonjë vend tjetër, që u tha mediave me anë të ministrit të Mbrojtjes apo një anëtari tjetër të delegacionit se Kryeministri i tij mbajti një fjalim, të cilin e vlerësoi edhe Presidenti Trump. Gazeta e rëndësishme greke “Kathimerini” tha se Kryeministri Tsipras kishte kohë që po përgatiste një takim me Presidentin turk Erdogan ( për këtë gjë do ta shfrytëzonte samitin). Ky takim u zhvillua dhe ata diskutuan për temën e nxehtë të arrestimit të dy ushtarëve grekë, që kanë kaluar disa kohë më parë kufirin. Ata diskutuan edhe për tema të tjera si ajo e refugjatëve. Gazetat japin sigurisht edhe detaje nga ky takim. Nuk thuhet aty askund se Tsipras takoi Trump- in, se Tsipras mbajti fjalim, se fjalimi u pëlqye. Nuk pati në shtypin grek asnjë foto korridori me Trump- in. Shtypi raportoi për samitin debatin për shpenzimet dhe qëndrimin e Presidentit Trump se Gjermania është nën kontrollin e rusëve.
Shtypi bullgar njoftoi se Rumen Rudev kryesonte delegacionin në NATO. Nuk doli asnjë foto e Rudev- it me Trump- in apo me ndonjë politikan tjetër. Shtypi pasqyroi debatin për shpenzimet dhe kaq. Shtypi rumun tha se Presidenti Klaus Johanis kërkoi një rol më të madh të NATO- s në drejtim të Detit të Zi. Ai kishte mbështetur fuqimisht anëtarësimin e Maqedonisë . Nuk pati në shtypin rumun asnjë foto takimi me Presidentin Trump. Nuk pati asnjë deklarim se fjalimin e pëlqeu Presidenti Trump etj.. Presidenti sllovak Andrej Kiska, sipas agjencisë kryesore të vendit “News Noa”, mbështeti qëndrimin e Presidentit Trump për përmbushjen e detyrimit të shpenzimeve. Ai tha se vendi i tij do të përmbushte detyrimin. Presidenti Kiska ka një marrëdhënie të mirë me Presidentin Trump, por nuk doli në shtyp ndonjë foto e tij me Presidentin Trump. Shtypi çek, gjithashtu nuk nxori ndonjë foto të Presidentit Milos Zerman me Presidentin Trump. Thjesht u raportua nga “Prague Daily Monitor, që është edhe gazeta kryesore, ajo që ndodhi në samit dhe u tha se Presidenti Zeman foli në mbështetje të qëndrimit amerikan. Dalia Grybauskaitë, Presidentja lituaneze që njihet edhe si mike e Presidentit Trump, nuk i dërgoi shtypit ndonjë foto. Shtypi thjesht pasqyroi debatin në samit dhe kaq. As që u tha gjëkund që ajo mbajti një fjalim, që u vlerësua nga Presidenti Trump apo nga dikush tjetër.
Është e kotë të themi që Presidenti Macron, Kryeministrat May apo Sanchez kërkuan të bëjnë korridoreve ndonjë foto dhe t’ia japin shtypit. Është qesharake që Kryeministri shqiptar vuan nga probleme të tilla dhe është e papranueshme që ai të endet samiteve për të gjetur foto me liderë të huaj, për të treguar se e duan dhe e vlerësojnë . David M. Herszenhorn dhe Jacopo Barigazzi, dy gazetarë të njohur, bënë një reportazh në “politico. eu” mbi miqtë apo aleatët e Presidentit Trump në Europë. Kryeministrja britanike Theresa May ka një marrëdhënie të ftohtë me Presidentin Trump, sepse Trump përkrah Boris Johnson- in, për të cilin ka thënë se “Ai është miku im i mrekullueshëm”. Gjithashtu, Presidenti Trump ka një qëndrim më radikal për Brexit sesa Kryeministrja May. Herzenhorn dhe Barigazzi shkruanin se qëndrimi i Trump- it ndaj May- t në samit e tregonte këtë ngërç. Trump ka vlerësim për Presidentin Macron. Ai tha në samit se “vlerëson lidershipin e tij dhe miqësinë me të”. Kur Macron nisi të flasë në frëngjisht, Trump tha: “Nuk e kuptoj, por tingëllon bukur”. Me Kancelaren Merkel, Presidenti Trump ka marrëdhënie të ngjashme si me Kryeministren May. Marrëdhënia e tyre është e tendosur. Pasi Presidenti Trump bisedoi disa minuta me Presidentin Erdogan në një cep, shkruhet në reportazh ( ah sikur t’i kishte ndodhur Ramës, çdo bënte ai) Presidenti Trump u largua duke buzëqeshur dhe duke thënë “E pëlqej këtë njeri, e pëlqej”. Reportazhi shkruan se në samit u vu re vlerësimi i Trump- it për liderët polakë , atë hungarezë, Presidentin Erdogan, Presidentin Macron, Presidentin Kiska, Presidentin Zeman. Megjithëse u vu re ky vlerësim ( që edhe dihej që më herët), shtypi turk, hungarez, francez, polak nuk nxori foto të liderëve të këtyre vendeve me Trump- in. Kryeministri Rama nuk mund të bëhet kurrë një i pëlqyer si liderët polakë, hungarezë, francezë, turq, sllovakë, çekë etj.. Rama, dhe këtë e dinë të gjithë edhe në administratën Trump, jo vetëm nuk është në këtë grup njerëzish, që e vlerëson Presidentin Trump, por është në grupin e atyre që kanë thënë se Trump është fatkeqësi e SHBA- së. Tani merre me mend kur Trump nuk shfaq pëlqim për Merkel- in apo May- n, Kryeministre të dy vendeve me rëndësi bazike për SHBA- në, por shfaq pëlqim për kundërshtarët politikë të tyre si Johnson apo Seehopher, si mund të shfaqë pëlqim për Kryeministrin Rama, i cili ka thënë ato që ka thënë për Trump- in.