UET diplomon 680 studentët e 2017- 2018, Guvernatori i fton për karrierë
Festa e diplomimit, sipërmarrësi Grigor Joti: Nëse e doni suksesin, atëherë “emri i lojës” është punë
Një eveniment i rëndësishëm, që shënon një nga çastet më të lumtura për të gjithë ata, të cilët ndër vite ia kanë kushtuar përpjekjet dhe vullnetin e tyre dijes, për t’u shpërblyer në fund me diplomën aq shumë të dëshiruar.
Universiteti Europian i Tiranës ka zhvilluar sot ceremoninë e 10- të të diplomimit të studentëve të tij.
E kthyer tashmë në traditë, ceremonia e diplomimit në Universitetin Europian të Tiranës kishte dy të ftuar të veçantë, të cilët mbajtën për studentët ‘ commencement speech”. Ose i quajtur ndryshe, “fjalimi i fillimit të jetës”. Këto fjalime, ashtu si në universitetet e mirënjohura ndërkombëtare, shërbejnë për të motivuar dhe frymëzuar studentët e sapodiplomuar në rrugëtimin e ri që i pret. Guvernatori i Bankës së Shqipërisë, Z. Gent Sejko; Themeluesi dhe drejtuesi i kompanisë së parë informatike në Shqipëri, INFOSOFT, Z. Grigor Joti; ( INFOSOFT është një nga 10 partnerët strategjikë të Universitetit Europian të Tiranës).
Ata ndanë me studentët jo vetëm historinë e tyre të suksesit, por edhe këshillat dhe botëkuptimin e tyre në lidhje me të ardhmen që i pret të sapodiplomuarit.
Guvernatori i Bankës Shqiptare, Gent Sejko, i pranishëm në ceremoninë e diplomimit të Universitetit Europian të Tiranës, ka ndarë me studentët këshillat e tij, për sa i përket së ardhmes që i pret ata tashmë në rolin e profesionistëve.
“Ky moment përbën një pikë kulmore për çdo njeri në jetën e tij. Përfitoj nga rasti që t’ju bëj thirrje që ta nisni këtë rrugëtim të gjatë, me kurajë, me dëshirë dhe me këmbëngulje. Kudo që ta ndërtoni karrierën tuaj, që në hapat e para të saj, por edhe më tej, përpiquni të jeni as më pak e as më shumë, por vetvetja juaj. Mos hezitoni të tregoni vlerat më të mira të karakterit dhe të moshës suaj të re, siç janë idealizmi, integriteti dhe ndershmëria. Mos harroni të sillni mes nesh energjinë tuaj, entuziazmin e moshës, kreativitetin dhe origjinalitetin që ju karakterizon. Luftoni pa kompromis dhe me idealizëm për përmbushjen e objektivave tuaja, për atë që besoni dhe që ju motivon më shumë në jetën tuaj të përditshme. Sot unë dua t’ju ftoj se e keni të hapur rrugën për karrierë në Bankën e Shqipërisë”.
Grigor Joti, President i INFOSOFT Group, në fjalimin e tij kundrejt stu- dentëve të sapodiplomuar, është shprehur në mënyrë të sinqertë në lidhje me sfidat dhe realitetin e tregut të punës që i pret studentët e sapodiplomuar . Në një fjalim miqësor dhe të shpenguar me të rinjtë e UET- it, ai u ka dhënë atyre edhe disa këshilla. “E vërteta është se ju keni shumë të drejtë të jeni të kënaqur e të lumtur sot, sapo kompletuat një detyrë shumë të rëndësishme të jetës suaj, në gjuhën e biznesit keni bërë investimin kapital kryesor. Tani do merrni rezultatet e këtij investimi. Dikush që do dojë një jetë të qetë e modeste, me diplomën e UET- it mund të zërë një punë të mirë, me një rrogë të mirë, të krijojë një familje, por gjithsesi do t’i duhet të numërojë ditët derisa të marrë rrogën tjetër. Nëse e doni suksesin, atëherë emri i lojës është punë, punë, punë. Edhe këtu në letër fjalën punë e kam shënuar me germa kapitale. E di që nuk po ju them ndonjë gjë të re. Por kjo është, ju sig- uroj se nuk ka një rrugë tjetër. Duhet edhe fat, por ju siguroj që fati shkon tek ai që punon”.
Duke e cilësuar diplomimin si fillimin e një procesi të ri në jetën dhe karrierën e studentëve, presidenti i UET- it, prof. dr. Adrian Civici, theksoi se UET- i i kushton një vëmendje të posaçme ndjekjes së vazhdueshme të karrierës së studentëve të tij edhe pas diplomimit . Z. Civici deklaroi se UET- i është tashmë një komunitet i veçantë, jo vetëm në Tiranë dhe në Shqipëri, por edhe përtej.
“Ne me studentët tanë Alummni që mbarojnë, vazhdojmë edhe për 5- 10 vjet të tjera të kemi kontakte të vazhdueshme për të parë se si ecën karriera e tyre profesionale dhe njëkohësisht për të parë edhe veten në pasqyrë se çfarë u kemi dhënë dhe sa i kemi përgatitur. Besoj se kemi shumë për të përmirësuar, por mbi të gjitha duhet të jeni të bindur që përpjekjet dhe vizioni jonë është maksimal për t’iu përgjigjur gjithë sfidave të kohës. Është një kënaqësi e jashtëzakonshme që në 10 vjet, unë pothuajse kam qenë në të gjitha ceremonitë, kjo e sotmja më duket shumë më e veçantë, shumë më speciale, shumë më e qeshur dhe më vjen mirë që tashmë UET- i është një komunitet i veçantë në qytet, edhe në Shqipëri, edhe përtej.
Rektori i Universitetit Europian të Tiranës, Tonin Gjuraj, deklaroi se në këtë rrugëtim të gjatë të UET- it, pavarësisht vështirësive, falë mundësive dhe aftësive ato janë vënë në rrugën e zgjidhjes. Rektori Gjuraj vlerësoi se Universiteti Europian i Tiranës përdor metoda mësimdhënieje ndërvepruese, duke mundësuar përdorimin e teknologjive bashkëkohore dhe ku vlerësohet mendimi krijues i studentëve.
“Në rrugën tonë ndeshemi edhe me probleme që sjellin njerëz paragjykues. Sigurisht, kemi probleme të natyrës për të cilat ata flasin, por ajo që ata nuk dinë është se ne zotërojmë edhe mundësitë edhe aftësitë që t` i zgjidhim ato. Ne jemi Universiteti Europian i Tiranës dhe e ndiejmë se jetojmë në një botë, e cila ndryshon me shpejtësi”.
Administratori i Universitetit Europian të Tiranës, prof. asoc. dr. Arbi Agalliu, u shpreh se ky 10- vjetor diplomimesh e gjen UET- in lider në sistemin e arsimit të lartë në Shqipëri. “Sot, më lejoni të them që ka ardhur një epokë e re, ku universitetet në sektorin privat do të administrohen nga vetë korporatat tashmë dhe ky është një shembull i imi personal, ku si drejtues departamenti, si pedagog i thjeshtë, më pas si drejtor i Shkollës së Doktoraturës e më pas si zv. rektor, vij sot si administrator i korporatës më dinamike në sektorin e arsimit të lartë në Shqipëri, ndërsa nuk diskutohet cilësia e studimit në sektorin privat në përgjithësi dhe e UET- it në veçanti, në krahasim me sektorin shtetëror”, tha z. Agalliu.
“Ky moment përbën një pikë kulmore për çdo njeri në jetën e tij. Përfitoj nga rasti që t’ju bëj thirrje që ta nisni këtë rrugëtim të gjatë, me kurajë, me dëshirë dhe me këmbëngulje. Kudo që ta ndërtoni karrierën tuaj, që në hapat e para të saj, por edhe më tej, përpiquni të jeni as më pak e as më shumë, por vetvetja juaj”