Tsipras: Shumë afër zgjidhjes, Greqia e fituar me Zonat Ekskluzive
Kryeministri grek Alexis Tsipras deklaroi dje se dy çështjet e mbetura mes Athinës dhe Tiranës, ajo e ligjit të luftës dhe kufijve, janë shumë pranë gjetjes së një zgjidhjeje, duke u fokusuar te këto dy tema edhe pse në diskutim është gjithashtu edhe ajo e Zonës Ekskluzive Ekonomike. Kryeministri grek u është referuar negociatave me Shqipërinë, gjatë një konference për shtyp pas përfundimit të samitit të NATO- s. “Është bërë një punë shumë esenciale ndërmjet dy ministrave të Jashtëm, në një sërë çështjesh që rëndojnë marrëdhëniet e të dy vendeve për dekada. Jemi shumë afër zgjidhjes që ka të bëjë me delimitimin e zonave ekskluzive ekonomike ( ZEE), një zgjidhje që i jep avantazhe të rëndësishme palës greke – nuk dua të hyj në detaje, por kryesisht hap rrugën për delimitimin gradual të ZEE- së së Greqisë, të paktën duke filluar nga Perëndimi që të mundim të avancojmë edhe me vendet e tjera”, është shprehur Tsipras. Sipas Kryeministrit grek, përparime në bisedimet me Shqipërinë janë bërë dhe për çështjet e tjera. “Kemi një zhvillim pozitiv sa u përket ushtarëve grekë, që humbën jetën dhe janë varrosur në tokën shqiptare dhe ditët e ardhshme do të bëhet një ceremoni përkujtimore për ta. Edhe ne nga ana jonë kemi bërë hapa kundrejt palës shqiptare, sa i përket lejes së drejtimit të automjeteve dhe në një sërë çështjesh të tjera, jo madhore, por të rëndësishme për marrëdhëniet ndërmjet të dy vendeve”, u shpreh Kryeministri grek. Tsipras e cilësoi si “shumë konstruktiv”, takimin që zhvilloi me Kryeministrin Rama në kuadër të samitit të NATO- s. “Me homologun shqiptar ramë dakord që periudhën e ardhshme dy ministrat e Jashtëm të intensifikojnë përpjekjet e tyre, pa pasur një presion të veçantë, që të shohin se deri në ç’masë do të mund të kemi një zgjidhje pozitive sa më shpejt që të jetë e mundur”, u shpreh Tsipras.