JETËSHKRIMI I AMBASADORIT ZENELI

Bashkim Zeneli lindi në Shkodër, më 04.02.1948. Ka kryer studimet për Drejtësi dhe ka ndjekur studimet pasuniversitare për Gazetari dhe Filozofi.

Në fillimet e punës së tij ka qenë përkthyes i gjuhës gjermane dhe më pas si gazetar dhe analist i çështjeve të politikës së jashtme.

Në vitin 1991 përfshihet në politikë, si sekretar për Marrëdhëniet me Jashtë në Partinë Socialiste dhe në vitin 1992, për dy legjislatura zgjidhet deputet në Kuvendin Popullor.

Si politikan i PS- së dhe si nënkryetar i Komisionit të Jashtëm të Kuvendit, ka përfaqësuar Shqipërinë në veprimtari të shumta ndërkombëtare dhe rajonale, veçanërisht në kuadër të Asamblesë parlamentare të NATO- s dhe OSBE- s.

Në nëntor 1997 emërohet ambasador i Shqipërisë në Gjermani deri në vitin 2002 e më tej, ambasador në Greqi deri në vitin 2006.

Është autor i qindra shkrimeve, analizave dhe studimeve për çështje të politikës së jashtme dhe sidomos të rajonit, të publikuara në shtypin e huaj dhe vendës.

Në dhjetor të 2015 botoi me shumë sukses dhe vlerësime librin “Për Gjermaninë – histori diplomatike dhe kujtime”. Së shpejti del në dritë libri tjetër për Greqinë.

Është nderuar edhe në Gjermani, edhe në Greqi. Është ambasadori i parë “Qytetar nderi i Athinës dhe nderuar me medaljen e artë “Zgalemi i lirisë”.

Në Gjermani është përfshirë 3 vite radhazi në “Enciklopedinë e figurave të shquara politike në Republikën Federale të Gjermanisë.

Mbas viteve ’ 90, si politikan dhe si ambasador, ka dhënë një kontribut të veçantë në luftën e Kosovës për liri dhe pavarësi.