PD: Si u hoq Teatri nga monument kulture

"Qëllimi jo ndërtimi i teatrit të ri, por falja e tokës privatit"

Partia Demokratike ka akuzuar kreun e qeverisë Edi Rama se ka përdorur pushtetin e Kryeministrit për të vënë në zbatim planin mafioz të ndërtimit të kullave në pronën e Teatrit Kombëtar. Këshilltari Ligjor i PD- së, Gazmend Bardhi, publikoi dokumentet, sipas të cilave qeveria e drejtuar nga Edi Rama ka hequr zonën e Teatrit Kombëtar nga zona e Asamblesë Monument Kulture. Bardhi kujtoi vendimin e vitit 2000 kur zona e qendrës së Tiranës u shpall "Ansambël Monument- Kulture" dhe u vendos që Teatri Kombëtar do të restaurohej. "Vendimi i parë është marrë nga qeveria në prill të vitit 2000. Vendimi shpalli "Ansambël Monument- Kulture"; Aksin Kryesor dhe Qendrën Historike të Qytetit të Tiranës. Ky Ansambël MonumentKulture kishte një shtrirje të gjerë dhe korrespondonte me përfshirjen në të, të të gjitha ndërtesave me vlerë historike në qytetin e Tiranës, të cilat duhet t'i nënshtroheshin ruajtjes dhe restaurimit të tyre. Ansambli Monument- Kulture përfshinte edhe Teatrin Kombëtar dhe zonën përreth tij derisa kryeministër u bë Edi Rama dhe kryetar bashkie Erion Veliaj, me bashkëpunimin kriminal të të cilëve, Tiranës po i zhduken pjesët historike, duke u zëvendësuar me kulla", tha Bardhi. Këshilltari ligjor i Grupit të PD- së kujtoi se prej 20 vitesh Edi Rama e ka pasur qëllim shkatërrimin e historisë dhe monumenteve të kulturës për të ndërtuar në vend të tyre kulla. "Dokumentet provojnë se qëllimi i Edi Ramës dhe Erion Veliajt nuk është ndërtimi i Teatrit të ri Kombëtar, por falja e pronës publike kompanisë ' Fusha ShPK', me synimin e vetëm të përfitimit korruptiv të rreth 205 milionë eurove. Për të realizuar planin mafioz 20- vjeçar për shembjen e Teatrit dhe ndërtimin e kullave, skema e Edi Ramës ishte: Qershor 2015- Emërimi i Erion Veliajt kryetar bashkie. Shkurt 2016 - Përgjysmimi i çmimit të truallit te zona e Teatrit. Mars 2016 - ' Fusha ShPK' blen tokë te zona e Teatrit. Prill 2017 - një vit më vonë, në kulmin e krizës politike parazgjedhore, Edi Rama vendosi zvogëlimin e Qendrës Historike të kryeqytetit. Me vendimin e datës 12 prill 2017, qeveria hoqi prej hartës së mbrojtur zonën e Teatrit Kombëtar dhe çdo zonë tjetër të Tiranës, ku ka planifikuar ndërtimin e kullave. Vendimi për zvogëlimin e Qendrës Historike është marrë pa pasur asnjë argument ligjor, teknik apo historik", tha Bardhi.