“Surpriza e fundjavës” arreston shpërndarësin e kokainës te ish- Blloku

TIRANE – Antidroga e Tiranës gjatë kësaj jave ka goditur tri raste të shpërndarjes së lëndëve të forta narkotike, kryesisht të llojit kokainë. Operacioni i fundit u zhvillua dje në afërsi të Liqenit Artificial, ku u arrestua në flagrancë një 44- vjeçar që dyshohet se furnizonte me kokainë lokalet në zonën e ish- Bllokut. Ndërsa janë shpallur në kërkim edhe dy bashkëpunëtorët e tij, emrat e të cilëve për arsye hetimi nuk u bënë publik nga Policia. Operacioni për arrestimin e 44- vjeçarit Fatjon Veseli, u kodua “Surpriza e fundjavës” dhe u organizua nga oficerët e Seksionit për Hetimin e narkotikëve. “Goditet një tjetër rast i shpërndarjes së drogave të forta, arrestohet poseduesi, si dhe shpallen në kërkim dy bashkëpunëtorët. Sekuestrohet lëndë e dyshuar narkotike e llojit kokainë, motor e aparat celular”, njoftoi dje Policia e Tiranës. Gjatë këtij aksioni, Policia njoftoi se u arrestua në flagrancë Fatjon Veseli, 44 vjeç, banues në Tiranë, i dënuar më parë për “Drejtim automjeti në gjendje të dehur”. Shërbimet e Policisë ishin në ndjekje të shtetasit të lartpërmendur pasi dispononin informacion se ai, në bashkëpunim me shtetas të tjerë shpërndante lëndë narkotike të llojit kokainë, në formë dozash në bazë klientele, në zonën e ish- Bllokut, “Komunës së Parisit” dhe “Tiranës së Re”. Ky shtetas është konstatuar nga shërbimet e Policisë në zonën e Liqenit Artificial dhe gjatë kontrollit fizik të ushtruar, brenda çantës së tij të krahut i është gjetur një qese me lëndë të dyshuar narkotike të llojit kokainë. Gjithashtu, gjatë kontrollit të ushtruar në banesën e këtij shtetasi është gjetur një motor pa targa, i cili pas verifikimeve të kryera rezultoi i vjedhur. “U sekuestruan në cilësinë e provës materiale 201 gramë lëndë e dyshuar narkotike e llojit kokainë, një motor dhe një aparat celular. Janë shpallur në kërkim dhe dy bashkëpunëtorët e shtetasit të arrestuar, ku për arsye hetimore nuk bëjmë të ditur të dhëna të tjera. Materialet iu referuan Prokurorisë së Rrethit Gjyqësor Tiranë në ngarkim të shtetasit të lartpërmendur për veprën penale ‘ Prodhimi dhe shitja e lëndëve narkotike’, parashikuar nga neni 283/ 1 i Kodit Penal”, tha dje zyrtarisht Policia e Tiranës.