Belgjika mund Anglinë dhe fiton medaljen e bronzit
Belgjika ka fituar bindshëm ndaj Anglisë në ndeshjen e luajtur për vendin e tretë në Botëror. Skuadra e drejtuar nga spanjolli Martinez ishte më kërkuese dhe donte ta mbyllte turneun me fitore. Një fitore që nuk bën të harrojë atë eliminim në gjysmëfinale nga Franca. Belgët ishin favoritë për të fituar Botërorin, duke shfaqur një lojë tërheqëse. Lojtarët luanin një futboll atraktiv, duke krijuar një iluzion te tifozët e tyre për të fituar trofeun në fund. Pasi mundën Brazilin, ata nuk arritën të shkonin në finale, ku Franca u bë e pakalueshme për ta.
PJESA E PARË Ndeshja nisi me gol për Belgjikën, që në minutën e 4- t shënoi me mesfushorin Mënie, i cili gjuajti brenda zonës një top të stërvitur nga Çadlir. Portieri anglez Pikford ishte i pafuqishëm për të ndalur topin pa shumë pretendime të Mënier. Anglia u mundua të reagonte, por ishte e pafuqishme, humbja me Kroacinë ishte akoma në mendjen e lojtarëve. Sterling pason për Kane që nuk arrin të shënojë nga brenda zonës. Belgët janë më të freskët dhe sulmojnë rrezikshëm me anë të De Brujne, që nis aksionet e tyre me shpejtësi. Lukaku ka mundësinë të dyfishojë rezultatin, por ndalet nga Pikford.
PJESA E DYTË Në pjesën e dytë janë belgët ata që hidhen në sulm. Por, anglezët mbrohen mirë. Në minutën e 70- të është Rashford që shfaqet i vetëm me Kortua duke e kaluar topin mbi trupin e tij, por në vijën fatale është Andervire që shpëton portën nga goli i barazimit. Lukaku vetëm disa minuta më pas mund të dyfishonte, por topi i dhënë nga De Brujne nuk zotërohet siç duhet nga sulmuesi i Mançester Junajtid. Është Hazard ai që në minutën e 82- të shënon golin e dytë për Belgjikën pas një aksioni model të tyre. De Brujne pason saktë për numrin 10, që brenda zonës mposht lehtësisht portierin Pikford. Minutat e mbetura nuk sjellin asgjë dhe Belgjika fiton 2- 0 ndaj Anglisë duke u renditur e treta në Botëror.