PER ÇDO DEGE
Universitetet, pikët e fundit që të shpallin fitues
Tabela me pikët e fundit për të fituar universitetin. Si duhet plotësuar Formulari A2 dhe shanset për një degë për maturantët e rinj
Konsultimi me kriteret e fakultetit dhe njohja me pikët e fundit për degët që duan kandidatët, janë dy këshillat e vlefshme që japin ekspertët në prag të plotësimit të Formularit A2.
Ndërsa të parat janë publikuar që në muajt e parë të këtij viti dhe afishuar tashmë pranë çdo faqeje online të fakulteteve, gazeta sjell në kujtesë fituesit e fundit në raundin e parë nga viti i kaluar. Tashmë, është koha që çdo kandidat, me laps e letër në dorë, të përllogarisë pikët që akumulon për degët përkatëse bazuar në formulat e shpallura dhe pesë komponentëve që tashmë i dinë: nota mesatare e gjimnazit llogaritur sipas vendimit të qeverisë, tre notat e provimeve me detyrim dhe dy lëndëve me zgjedhje. Kështu, bazuar në kalkulimet e para, ata përllogarisin me afërsi nëse i afrohen sadopak kufirit minimal të pikëve në profilet që dëshirojnë.
PËRLLOGARITJET Në portalin U- albania, tashmë kandidatët mund të marrin gjithë informacionin e duhur përpara se të bëjnë plotësimin e formularit A2, me dhjetë degët e preferuara në uni- versitetet publike e private. Gazeta liston pikët e fituesit të fundit përpara regjistrimeve të raundit të parë, ose përpara uljes së vizës së kuqe. Në bazë të tyre, gara më e fortë është në Universitetin e Mjekësisë, Politeknikut e më pas në atë të Tiranës. Në degët e Fakultetit Ekonomik, fituesi i fundit është me 955 pikë, ndërsa te Gjuhët e Huaja niveli është pak më i ulët. Në asnjë rast, mesatarja e maturës si dhe ajo e përllogaritur sipas Vendimit të Këshillit të Ministrave, nuk është më pak se tetë ( me përjashtim të gjuhës ruse). Në dilemën për zgjedhjen e dhjetë preferencave, më të mirët e kanë të thjeshtë. Në vështirësi janë maturantët, të cilët dëshirojnë fort një profil dhe duhet të zgjedhin nëse ia vlen të presin uljen e vizës apo edhe raundin e tjetër, në vend që të shkojnë në një degë që e kanë të listuar, por që s’e dëshirojnë aq shumë. Përkundrejt tyre, “pesanjosët” kanë më pak zgjedhje për në universitet. Programe profesionale 2- vjeçare si në publik ashtu edhe në privat janë në dispozicion të tyre edhe sivjet. Në përfundim të aplikimeve, në muajin gusht, QSHA do të publikojë Librin e Transparencës, i vlefshëm për vijimin e garës dhe e vetmja mundësi që maturantët të shohin përmes ID- së së tyre nëse të dhënat e hedhura në sistem janë të sakta. Vetëm pas këtij procesi, lista me aplikuesit për çdo degë iu shkon universiteteve përkatëse. Këto të fundit, në sajë të formulave të shpallura dhe të dhënave të tyre rankojnë kandidatët nga ai me më shumë pikë deri te ata me pikët minimale. Kuotat në dispozicion ndajnë me një vizë të kuqe fituesit nga humbësit për raundin e parë, fituesit e të cilit do të shpallen në datën 29 gusht. Edhe në garën e këtij viti në universitete, raundet mbeten dy, por me faza të përcaktuara regjistrimesh 48- orëshe.