Balla: Kërkesa për vota të PD e LSI s'është pazar

Socialistët, apel pakicës: Votoni ligjin e Reformës në Drejtësi

Kryetari i Grupit të Partisë Socialiste, Taulant Balla, ka deklaruar dje se ftesa ndaj PD- së dhe LSI- së për të votuar një prej ligjeve të Reformës në Drejtësi, nuk është pazar. Sipas Ballës, forcat politike kanë detyrim moral dhe duhet të tregojnë përgjegjshmëri për të votuar një prej ligjeve të Reformës në Drejtësi. Kreu i Grupit të PS- së ka thënë dje se vonesat në ngritjen e institucioneve të reja të Drejtësisë kanë ardhur për shkak të vonesave që u shkaktuan nga opozita, e cila u ngujua në çadrën e protestës. "Gjatë kësaj jave parlamentare, që vijon prej ditës së nesërme, një prej çështjeve më të rëndësishme që mbetet është rivendosja në afat për shkak të tejkalimit të tij, të regjistrimeve të reja në Shkollën e Magjistraturës, por edhe sistemimin e atyre që kanë mbaruar, është një prej detyrimeve kryesore në kuadër të vijimit të mëte- jshëm të implementimit të Reformës në Drejtësi. Ka pasur një tejkalim të afatit, që vjen për shkak të vonesës së ngritjes së institucioneve të reja të drejtësisë. Kjo, për shkak të vonesës që u krijua, kujtoj këtu, nga çadra dhe më pas nga apelimi i kotë në Gjykatën Kushtetuese të procesit të vetingut. Nuk bëhet fjalë këtu për një Pazar, sikurse kanë guxuar ta quajnë përfaqësues të opozitës", është shprehur Balla. Sipas tij, me votimin në Parlament të ligjit që kërkon 84 vota, do t'u krijohet mundësia studentëve që të vazhdojnë Shkollën e Magjistraturës. "Ne kemi vullnetin e plotë politik për të ecur përpara në implementimin e plotë të Reformës në Drejtësi dhe vetingut, por ky ndryshim në ligj kërkon një shumicë të cilësuar, të cilën ne synojmë ta realizojmë përmes dialogut dhe konsensusit politik, me ato palë politike, të cilat janë të gatshme t'u qëndrojnë konsekuente qëndrimeve të tyre të mëparshme, në mënyrë që të përmbushim të gjitha detyrimet së bashku", është shprehur Balla.