Deshamp: Keqardhje për djemtë, por krenar për Kupën

"Pas një trofeu të tillë, asgjë nuk është më njësoj"

Kupa e Didie Deshampit. Në dy Botërorë të fituar nga Franca në epoka të ndryshme, emëruesi i përbashkët është pikërisht ai.

Në 1998 ishte kapiten i "Gjelave", teksa dje udhëhoqi në suksesin final një skuadër që u shpall kampione. Pas ndeshjes, duke komentuar suksesin e të tijve, Deshamp deklaroi: "Gjithçka është kaq e bukur dhe e mrekullueshme. Jam shumë i emocionuar. Disa nga këta djem kanë provuar ndjesitë e të qenit kampionë në moshën 19- vjeçare, por duhet të bëjnë kujdes. Henri dhe Trezege ishin po kaq të rinj kur fituan Kupën e Botës, por ata nuk arritën kurrë të përsëriteshin".

Fitorja e djeshme i jep një rekord që kanë vetëm dy legjenda. Në fakt, së bashku me Mario Zagallon dhe Franc Bekenbauerin, Didie Deshamp bëhet njeriu i tretë që e fiton Kupën e Botës fillimisht si futbollist e më pas si trajner. Të tilla statistika do të ketë ndoshta kohë t'i shijojë më vonë, teksa fjalët e tij janë një lumë elozhesh për skuadrën që e udhëhoqi drejt triumfit. "Nuk ka qenë gjithçka e thjeshtë, por me këtë sukses treguam forcën e punës. Jam shumë i lumtur për këtë skuadër, që sot qëndron mbi çatinë e botës. Dy vjet më parë ishte shumë e dhimbshme finalja e humbur në Europian, por ja që shërbeu për të na dhënë më shumë pjekuri. Mbase po të ishim shpallur kampionë atëherë, sot nuk do të ishim këtu", sqaroi 49- vjeçari, dukshëm i emocionuar.

Edhe pas një suksesi të tillë, Franca e tij kritikohet, por Deshamp e ka kryer misionin dhe tashmë hidhet në kundërsulm për të mbrojtur ata që tashmë i konsideron djemtë e tij: "Ndoshta nuk zhvilluam një ndeshje të madhe, por kemi treguar shumë cilësi në aspektin mendor. Të mos harrojmë se sot shënuam katër gola dhe për mendimin tim ishte një fitore e merituar. Ajo që njerëzit do të kujtojnë janë një ekip kampion. Patjetër që sot ( dje) patëm vështirësi, patjetër që nuk luajtëm mirë, po treguam gjithashtu të gjitha cilësitë që i duhen një ekipi për t'u shpallur kampion. Më vjen keq vetëm për faktin se, që sonte çdo gjë për ta do të jetë ndryshe. Nuk mund të jesh më i njëjti pasi shpallesh kampion bote. Mund të fitojnë tituj të tjerë, të arrijnë shumë suksese, por asgjë nuk do të jetë më lart sesa fitimi i Kupës së Botës".

Pas ndërprerjes së konferencës për shtyp nga një grup lojtarësh që hynë në sallë, Deshamp rimori fjalën për një mesazh të fundit, përpara festës së madhe me ekipin: "Ky është një moment gëzimi për futbollistët, të cilët e kanë merituar gjithçka arritën në këtë turne. Për 55 ditë nuk ndalëm së punuari, por kurorëzimi kampionë bote është diçka që u përket vetëm djemve. E duam Francën dhe jemi krenarë që jemi francezë dhe pjesë e kësaj kombëtareje. Rroftë Franca!"