Mesazhi i Hahn për Reformën: Përgjegjësi e të dy palëve, votoni ligjin e Magjistraturës
Meta: Gjithëpërfshirja, element kyç për suksesin e reformave
Presidenti Meta priti dje komisionerin Europian për Politikën e Fqinjësisë dhe Negociatat e Zgjerimit, Johannes Hahn. Kreu i shtetit vlerësoi bashkëpunimin e Komisionit Europian me Shqipërinë në këtë fazë të procesit të negociatave. "Në vijim të vendimit të Këshillit Europian të qershorit, kreu i shtetit çmoi angazhimin e menjëhershëm të komisionerit Hahn për nxitjen e hapave të mëtejshëm drejt çeljes së negociatave të anëtarësimit vitin ardhshëm", thuhet në njoftimin e Presidencës për përmbajtjen e takimit. Sipas Presidentit të Republikës, ecurinë e mëtejshme të reformave do ta forconte gjithëpërfshirja dhe besueshmëria. "Presidenti Meta vlerësoi mundësinë e bashkëpunimit dhe të një leximi të përbashkët të përmbushjes së sfidave madhore për të garantuar çeljen e negociatave. Gjithëpërfshirja dhe besueshmëria janë ele- ment kyç për ecurinë e suksesshme të reformave, nënvizoi Presidenti i Republikës", thuhet në njoftimin e zyrës së shtypit të Presidentit të Republikës. Ai vlerësoi fokusimin e Brukselit te Ballkani Perëndimor. "Presidenti Meta e cilësoi tejet të rëndësishëm përqendrimin e axhendës europiane të tri muajve të fundit te Ballkani Perëndimor, një mbështetje e qartë e perspektivës europiane të rajonit", thuhet në njoftimin e Presidencës për këtë takim. Kjo është vizita e parë komisionerit për Zgjerim Johannes Hahn në Tiranë, pas vendimit të Këshillit Europian për caktimin e një date për hapjen e negociatave me Shqipërinë. Për këtë vendim, mesazhi i Presidentit Meta ka qenë përgjegjësi dhe bashkëpunim mes forcave politike në vend. Presidenti është shprehur se konkluzionet e Këshillit të BE mbi negociatat e anëtarësimit të Shqipërisë duhen mirëpritur. "Ne të gjithë duhet ta vlerësojmë dhe çmojmë vullnetin pozitiv, me të cilin, si Komisioni Europian ashtu edhe të gjitha vendet anëtare, e mirëpresin procesin e integrimit të Shqipërisë dhe gjithë rajonit në BE. Kjo qasje duhet të na nxisë për një lexim të drejtë dhe realist të sfidave serioze që kemi përpara, veçanërisht në fushën e sundimit të ligjit. Një vit kalon shpejt, ashtu si nga dje kaloi një ditë. Provimi ynë i qershorit të ardhshëm do të jetë shumë i vështirë e kërkues pasi edhe vetë Bashkimi Europian do të ketë provimin e tij zgjedhor në të njëjtën kohë. Ndaj, i ftoj të gjithë për përqendrim, përgjegjësi dhe bashkëpunim", ka deklaruar Presidenti Meta për vendimin e Këshillit Europian.