Rama, ftesë opozitës për zgjedhjet
"Të përfundojmë reformën zgjedhore në prani të Komisionit"
Kryeministri Rama i kërkoi opozitës që bashkë me maxhorancën të përfundojë sa më shpejt reformën zgjedhore, tani që edhe Komisioni Europian do të monitorojë legjislacionin shqiptar.
"Me bindje them se në këtë proces është e domosdoshme që ne të krijojmë një tryezë tjetër, një tryezë të përbashkët, një tryezë pune të të gjitha palëve që mund të vazhdojnë dyluftimin jashtë kësaj tryeze, por duhet lënë një orë dhe një kohë për këtë tryezë, sepse, fjala vjen, nëse i referohemi atyre pikave orientuese që ka në konkluzionet e Këshillit, na duhet që të konkludojmë një reformë zgjedhore të nevojshme, të arsyeshme, të bazuar në rekomandimet e OSBE/ ODIHR- it. Rekomandimet janë shumë të qarta. Nuk kanë vend për ekuivoke apo për keqkuptime, që ne i krijojmë edhe aty ku s'ka vend, por në këtë rast, procesi është i shoqëruar edhe nga Komisioni, edhe nga të tjerë aktorë dhe është një mundësi e mirë, që në tryezën e reformës zgjedhore, bashkërisht me opozitën, ne të japim një rezultat në një kohë të shpejtë, pasi dhe në pikëpamje të legjislacionit tonë, që reforma zgjedhore të jetë ap- likueshme në zgjedhjet e ardhshme, që janë pas një viti, duhet që legjislacioni të adoptohet të paktën deri në 6 muaj përpara", tha Rama. Dje në Tiranë qeveria dhe komisioneri për Zgjerimin, Johannes Hahn, zhvilluan takimin e parë përgatitor për hapjen e negociatave me BE, i cili do të vijojë përgjatë 12 muajve të ardhshëm. Komisioni Europian do t'i bëjë një skanim të hollësishëm përputhshmërisë së legjislacionit shqiptar me standardet e vendeve anëtare të BEsë. Rama tha se shumë shpe- jt do të paraqesë një platformë bashkëpunimi me opozitën. "Politika bllokuese nuk të çon larg, por na dëmton të gjithëve së bashku. Megjithatë, këto janë tema që ne jemi duke u përgatitur për t'i trajtuar me opozitën. Shumë shpejt do të paraqesim një platformë propozimesh për bashkëpunim me opozitën. Do të kërkojmë angazhimin e opozitës, pa kërkuar dhe pa pretenduar për asnjë çast që opozita të lërë mënjanë betejën e saj politike, ashtu siç ajo e mendon në të drejtën e saj, por duke pretenduar që në këtë proces, Shqipëria të jetë e para dhe pastaj, interesat e partive dhe dinamikat e betejës politike të vijnë më pas", tha Rama.