Bylykbashi: Reforma në Drejtësi ka dalë nga shinat ligjore
Deputeti i PD- së, juristi Oerd Bylykbashi, i është drejtuar me një deklaratë komisionerit të Zgjerimit, Johanes Hahn, për të cilin tha se e kanë gënjyer. "Komisioneri Hahn tha se i duhet hapur rruga ndryshimeve të ligjit për Shkollën e Magjistraturës që të zgjidhet ngërçi. Përsëri e kanë gënjyer! Regjistrimi në shkollë i studentëve të rinj nuk është reformë, është rutinë dhe nuk zgjidh gabimet apo fajet e rënda konceptuale të reformës. Boshllëku, që komisioneri e quajti dizaster, nuk mund të mbushet dot nga rekrutimi i studentëve. Duhen tre vite që ata, që do të rekrutohen, të mund të quhen gjyqtarë e prokurorë, por do të jenë pa eksperiencë. E vetmja eksperiencë do të jetë ajo që do t'i japë linja politike që kontrollon sot Magjistraturën", tha deputeti i PD- së. Sipas tij, opozita e kundërshtoi futjen e Shkollës së Magjistraturës në votimin me 3/ 5- tat, por këtë e kërkoi Edi Rama. "Reformë do të thotë të ngresh institucionet e reja ? të drejtësisë që do të zëvendësojnë të vjetrat. KLD është drejt fundit, por KLGJ dhe KLP që do ta zëvendësojnë as që duken në horizont. Janë bllokuar, sepse 6 gjyqtarët dhe 6 prokurorët që duhen emëruar, nuk dihet kur do të zgjidhen! Gjithmonë, nëse vetingu do të lërë ndonjë në këmbë. Pa u ngritur KLGJ dhe KLP nuk emërohen dot Gjykata e Posaçme Antikorrupsion, SPAK dhe BKH. Pra, Rama dhe ministrat do të vazhdojnë të livadhisin. Pa KLGJ e KLP as ata magjistratët e rinj nuk emërohen dot, siç thotë Kushtetuta e 2016- s", thekson Bylykbashi, i cili shtoi më tej: "Sot reforma? në drejtësi ka dalë nga të gjitha shinat dhe treni ka ngecur në zhavorr. Zoti komisioner, pa e rikthyer trenin në shinat e Kushtetutës, siç u vendos me konsensus, do të vazhdoni të habiteni!"