Xhezair Zaganjori dhe Medi Bici, në sitën e vetingut

Komisioni i Pavarur i Kualifikimit ka njoftuar datën 20, si ditën ku përballë vetingut do të jetë kreu i Gjykatës së Lartë, Xhezair Zaganjori. Ai do të jetë kështu gjyqtari i tretë i Gjykatës së Lartë, që do të përballet me vetingun. Trupa gjykuese përbëhet nga Olsi Komici, Pamela Qirko dhe Roland Ilia. Seanca do të mbahet në orën 13: 00. Po kështu, më datë 30 korrik është caktuar edhe seanca dëgjimore për gjyqtarin tjetër të Gjykatës së Lartë, Medi Bicin. Ky i fundit ka deklaruar pasuri modeste në deklaratat periodike të pasurisë. Megjithatë, i mbetet Komisionit të Pavarur të Kualifikimit që të nxjerrë hetime të thelluara për pasurinë e gjyqtarit tjetër të Gjykatës së Lartë. Deri më tani, në veting kanë kaluar tre anëtarë të kësaj Gjykate, ku dy kanë ngelur dhe një ka kaluar.

Komisioni i Pavarur i Kualifikimit vendosi ditën e djeshme që të shkarkojë nga detyra edhe gjyqtarin tjetër të Gjykatës së Lartë, Tom Ndreca. Ky i fundit u shpall i papërshtatshëm për detyrën dhe me pasuri të pajustifikuar. Vetë gjyqtari nuk ishte prezent në momentin e dhënies së vendimit, por përfaqësohej nga avokatja e tij. KPK ka konstatuar deklarata kontradiktore në lidhje me apartamentin 120 metra katrorë të gjyqtarit, i cili nuk ka deklaruar garazhin, një automjet që ka blerë i biri në vitin 2005 dhe nuk justifikon kursimet kesh në vlerën 1.5 milionë lekë. Gjyqtari Ndreca është justifikuar për mospërputhjet në deklarata, duke thënë se nuk ka pasur pasuri të fshehura. Ai tha se KPK nuk ka llogaritur të ardhurat nga pagat për vitet 1980- 2003. “Dua t’ju kujtoj se unë e kam përfunduar shkollën në vitin 1979 dhe që nga ajo kohë kam punuar”, pati thënë Ndreca në seancën dëgjimore javën e shkuar. Sa i përket kriterit të integritetit të figurës, KPK vlerëson se gjyqtari Tom Ndreca nuk ka plotësuar me saktësi formularët për DSIK. Ai, sipas komisionit, nuk ka deklaruar në këta formularë kontaktet me kunatin e tij, i cili është arrestuar vite më parë me 0.4 gramë kanabis sativa. Pas arrestimit, sipas KPK- së, Policia gjeti 6 kg kanabis në banesën e kunatit të gjyqtarit, mirëpo, hetimet për të u pushuan, pasi “nuk pati prova që droga i përkiste atij”. Sipas KPK, Ndreca e ka ditur këtë fakt dhe nuk e ka deklaruar në formularin e pastërtisë së figurës. Por, gjyqtari Tom Ndreca pretendon se nuk e ka fshehur këtë fakt, pasi nuk e kanë pasur detyrim për ta deklaruar. Ai është pyetur nëse kishte pasur dijeni për nisjen e procedimit penal për kunatin, por gjyqtari tha se nuk e dinte se çështja kishte përfunduar në Prokurori. Avokatja e tij tha se KPK ka bërë interpretim të gabuar, pasi kunati i gjyqtarit nuk mund të konsiderohet person që vjen nga krimi i organizuar. KPK pyeti gjyqtarin Ndreca për një aplikim të tijin për kredi si i pastrehë. Sipas KPK- së, gjyqtari Ndreca ka aplikuar për kredi si i pastrehë, në një kohë që ishte i strehuar dhe kishte potencial financiar. Mirëpo, gjyqtari pati thënë se kishte nevojë për strehim, duke përmendur se ka dy djem që janë kryefamiljarë. “Kam dy kurora në shtëpi, sigurisht që kam pasur nevojë për strehim”, u shpreh gjyqtari Tom Ndreca. Megjithatë, kredia si i pastrehë nuk është mundur të përfitohej nga gjyqtari, pasi banka e ka skualifikuar si kandidat.