Debati, PD kundër dyfishimit të gjobave për emigrantët
Ndreu: Të huajve që iu hiqet patenta, të paguajnë dyfishin e gjobës
Opozita ka refuzuar dje të japë konsensus për ndryshimin e propozuar nga Partia Socialiste të Kodit Rrugor, e cila parashikon që emigrantët apo shtetasit, që iu hiqet patenta në Shqipëri, mund ta rimarrin atë, por duke paguar dyfishin e vlerës së gjobës.
Nisma është propozuar nga deputeti i PS- së, Pjerin Ndreu, i cili ka deklaruar se ky ndryshim ligjor u jep mundësinë shqiptarëve që jetojnë jashtë, apo shtetasve të huaj, që të mos sorollaten me muaj të tërë nëpër zyrat e shtetit, por, nëse duan, mund ta rimarrin patentën direkt, duke paguar dyfishin e gjobës. “Për lejedrejtimet e lëshuara nga një shtet i huaj, pezullimi i parashikuar në dispozitat e këtij neni konvertohet në pagesën e një shume, që është sa dyfishi i masës administrative maksimale të parashikuar për dispozitën e shkelur”, thuhet në amendamentin e PS. Aktualisht, gjoba maksimale dhe që shoqërohet me heqjen e lejes së drejtimit, sipas drejtorit të Qarkullimit Rrugor, është 15 mijë lekë të rinj. Pra, një shtetas i huaj ose një emigrant, do duhet të paguajë 30 mijë lekë për ta rimarrë sërish patentën direkt në postbllokun që i ka vënë gjobën. Por, opozita nuk e ka pranuar këtë nismë, pasi ka kërkuar që e njëjta zgjidhje të bëhet dhe për shtetasit shqiptarë, e për rrjedhojë ka deklaruar se nuk do ta japë votën pro. “Duhet ta tërhiqni këtë dhe të kërkoni dakordësi për pikat e tjera të Kodit Rrugor dhe t’i jepet zgjidhje reale për shqetësimet që kanë dhe jo vetëm për propagandë. Pra, i jep zgjidhje vetëm atyre që vijnë për pushime, por nuk u jep zgjidhje problematikave që kanë qytetarët shqiptarë që kanë problematika me Kodin Rrugor”, tha dje Ervin Salianji. Ndryshimet në Kodin Rrugor kërkojnë minimalisht 84 vota, nga të cilat maxhoranca deri tani ka vetëm 79 vota në Parlament.
DEBATI Gjatë debatit, deputeti propozues, Pjerin Ndreu, tha se nisma duhet miratuar në korrik, në mënyrë që të krijohet mundësia që të zgjidhen këto problematika që hasen në muajin gusht. “Kjo s’ka të bëj me show, por realitet. Ka një cirkuit të tmerrshëm për rastet e patentave të huaja. Patentat e huaja i merr pas 3 muajsh. Kjo nismë duhet miratuar në korrik sepse vijnë flukset e emigrantëve në gusht dhe ata nga Kosova. Është nismë që duhet të miratohet shumë shpejt. Me këtë zgjidhet një ngërç. Ka pasur raste kur emigrantët kanë humbur vendin e punës, sepse e kanë të varur vendin e punës nga ajo patentë në vendet ku jetojnë”, tha dje Pjerin Ndreu. Por, për demokratët, ndryshimet në Kodin Rrugor nuk mund të jenë të pastudiuara mirë. Sipas tij, duhen zgjidhur dhe problematikat e shtetasve shqiptarë. “Kanë problematika shumë të mëdha qytetarët, duke filluar nga radhët e gjata që mbajnë në Komisionet e Patentave, ku ju mund të propozoni ose mund të bëjmë së bashku një ndryshim të dakordësuar për të detyruar Po- licinë e shtetit dhe Ministrinë e Brendshme për të rritur sportelet apo për ta dixhitalizuar procesin. Nuk besoj se ashpërsimi i masave represive sjell zgjidhje në situatat e kundërvajtjeve, siç janë këto”, tha Salianji. Por, edhe pse opozita nuk ka dhënë dakordësinë, kryetarja e Komisionit të Sigurisë, Ermonela Felaj, e ka votuar projektligjin vetëm me votat e maxhorancës.