“Exchanget e noterët përdoren për pastrim parash”
Deputetja Tabaku: Alarmin e dha Banka e Shqipërisë
Opozita ripërsëriti shqetësimin për pastrimin e parave në vend. Deputetja e opozitës dhe nënkryetarja e Komisionit të Ekonomisë, Jorida Tabaku, dje në mbledhjen e Komisionit, iu referua disa të dhënave të raportit konfidencial të Bankës së Shqipërisë, ku, sipas saj, provojnë denoncimet e opozitës. Nënkryetarja e Komisionit të Ekonomisë theksoi se është sektori i ndërtimit fusha ku po pastrohen paratë, duke përfshirë dhe pikat e këmbimit valutor dhe kontratat e dorëzanisë që nënshkruhen te noterët. Deputetja e Partisë Demokratike, Jorida Tabaku, citoi raportin konfidencial të Bankës së Shqipërisë dhe i kërkoi kryetarit të Komisionit të Ekonomisë raportimin në Komision të Guvernatorit të Bankës së Shqipërisë. Tabaku shpjegoi se disa pjesë të raportit janë publikuar në media dhe deputetëve nuk iu është vënë në dispozicion. "Në disa raste nuk disponohen dokumente që provojnë burimin e fondeve, të cilat kryesisht mbeten në nivel deklaratash për transaksione të kryera nga klientët me para fizike cash, në llogari individuale tregtare. Banka e Shqipërisë, me inspektimet e saj me fokus rastet e pastrimit të parave, ka gjetur transaksione të pajustifikuara të kryera në këto banka. Janë gjetur mangësi në plotësimin e të dhënave të klientëve në biznes, PIKA të këmbimit valutor u mbyllën në vitin 2017, sipas të dhënave të raportit të mbikëqyrjes financiare të Bankës së Shqipërisë. Referuar rezultateve të vlerësimit që jepen në raport, 20 subjekte janë vlerësuar me rrezik të lartë në pastrimin e parave, ku katër prej tyre janë banka, 18 subjekte financiare jobankare dhe 7 shoqëri të kursim kredit, për shkak të mosraportimit të transaksioneve. në sistem, si edhe klasifikimin e klientëve sipas rrezikut ku konstatohen mangësi në kundërshtim me ligjin e parandalimit të pastrimit të parave", citoi Tabaku. Deputetja e PD- së tha se, sipas raportit, numri i institucioneve financiare jobankare është dyfishuar. "Janë institucione, të cilat janë jashtë sistemit bankar dhe janë duke u përdorur për pastrim parash. Kërkoj informacion për pikat e këmbimit të parave. Sipas të dhënave tona, pikat e këmbimit të parave janë duke u rritur në mënyrë eksponenciale, exchange të cilat po përdoren njëkohësisht për pastrim parash. Kërkojmë informacion edhe nga Ministria e Drejtësisë për kontratat që janë duke u bërë te noterët. Informacion që ky raport i Bankës së Shqipërisë, i departamentit të mbikëqyrjes e përmend. Kontratat e dorëzanisë te noterët janë duke angazhuar shuma fondesh të jashtëzakonshme, duke i përdorur këto si burim i pastrimit të parave", u shpreh Jorida Tabaku.