Macron takon Vuçiç: Zgjidhje për Kosovën
Takimi, para negociatave Kosovë- Serbi të drejtuara nga BE
Presidenti serb, Aleksandar Vuçiç, takoi Presidentin francez, Emmanuel Macron, të martën, një ditë përpara vijimit të dialogut Kosovë- Serbi, të udhëhequr nga BE. Vuçiç dhe Macron biseduan ballë për ballë në Pallatin Elysee. Kreu i shtetit francez e mirëpriti Vuçiç me nderime ushtarake e më pas ata nisën takimin. Ky takim midis dy presidentëve është mbajtur në një moment të rëndësishëm, në prag të një raundi të ri të dialogut midis Beogradit dhe Prishtinës. Vuçiç dhe Macron do të diskutojnë marrëdhëniet dypalëshe, bashkëpunimin ekonomik dhe situatën në rajon, me theks të veçantë në dialogun e Brukselit dhe integrimin europian të Serbisë. Pas takimit ballë për ballë, presidentët do të bashkohen me bashkëpunëtorët e tyre për një drekë pune, të organizuar nga Macron në Pallatin Elysee. Vizita e Vuçiç në Francë është shumë e rëndësishme për Serbinë, sipas agjencisë “B92”, duke pasur parasysh se hera e fundit që një President francez vizitoi Beogradin ishte 18 vjet më parë. Në prag të largimit të tij për në Paris, Vuçiç tha se priste shumë nga bisedimet me Macron. “Mendoj se ky takim është shumë i rëndë- sishëm për Serbinë. Ne nuk kishim pasur një komunikim të tillë në periudhën e mëparshme midis presidentëve francezë dhe homologëve të tyre serbë”, tha Vuçiç. Presidenti Macron bëri të ditur se do të qëndrojë për një vizitë zyrtare në Serbi në nëntor të këtij viti. Në konferencën për shtyp pas takimit, Vuçiç tha se, “Ne morëm mbështetjen për arritjen e një marrëveshjeje me shqiptarët në Kosovë, në të mirë të sigurimit të paqes për të gjithë rajonin”. Ai shtoi se në këtë takim u fol edhe për dialogun e Brukselit mes Prishtinës dhe Beogradit, si dhe për marrëdhëniet bilaterale Beograd- Paris. Presidenti i Kosovës, Hashim Thaçi, dhe ai i Serbisë, Vuçiç, do të rifillojnë negociatat e tyre të sponsorizuara nga BE në Bruksel, pas takimit të Vuçiç me Macron, ku Kosova ishte një nga temat kryesore të bisedimeve.