Vokshi: Rama mashtroi, "Fusha" s'është kufitare me truallin e Teatrit
Partia Demokratike ka publikuar dje fakte të reja, që, sipas tyre, tregojnë se Kryeministri Edi Rama dhe kryebashkiaku Erion Veliaj ka gënjyer Kuvendin. Sipas Albana Vokshit, argumenti kryesor në ligjin e miratuar në Parlament që i hapte rrugën kompanisë "Fusha" për të ndërtuar Teatrin, ishte fakti se është pronare e truallit kufitar me Teatrin. Por në hartën e publikuar nga PD, sipas Vokshit, firma "Fusha" ka në pronësi vetëm 298 m2, të cilat nuk janë në kufi me truallin e Teatrit Kombëtar. "Argumenti kryesor, siç shkruan qeveria në shpjegimin e ligjit, është se propozimi i ' Fusha ShPK' për të ndërtuar te teatri, u pranua edhe për faktin se kompania është pronare kufitare. Ky është një mashtrim skandaloz që u bëhet shqiptarëve, i bëhet Presidentit të Republikës dhe Komisionit Europian që po shqyrton çështjen! Pavarësisht se Edi Rama e ndaloi kryeregjistruesin e pronave të informonte Parlamentin për pronën e kompanisë ' Fusha ShPK', Partia Demokratike ka zbuluar mashtrimin e Edi Ramës, Erion Veliajt dhe kompanisë ' Fusha'! E vërteta është se: ' Fusha ShPK', të cilin Edi Rama po e përdor si kompani guaskë për pastrimin e parave të drogës dhe korrupsionit, nuk është pronar kufitar me pronën e Teatrit, siç thotë qeveria në ligj. Kompania ' Fusha' ka në pronësi të saj vetëm 298 metra katrorë jo kufitarë me Teatrin, siç duket qartë në hartë. Ose thënë ndryshe, më pak se 3 për qind të të gjithë sipërfaqes që Rama kërkon t'ia falë me ligj. Edi Rama dhe kukullat e tij, Veliaj e Kumbaro, kanë gënjyer qëllimisht Kuvendin! Kjo është një arsye e mjaftueshme që Presidenti të mos e dekretojë ligjin korruptiv ' RamaFusha'", tha dje Vokshi. Deputetja e PD- së kërkoi nga Prokuroria të hetojë këtë çështje, duke treguar se nuk është e varur politikisht.