Shkarkimi i Ndrecës e Thanzës, Berisha: Rama urren veriorët
Ish- Kryeministri Sali Berisha ka komentuar dje vendimin e Komisionit të Pavarur të Kualifikimit, i cili largoi nga sistemi i drejtësisë dy gjykatësit e Gjykatës së Lartë, Admir Thanza dhe Tom Ndreca. Në komentin e tij, Berisha tha se procesi i vetingut po kryhet si një “hakmarrje primitive”, duke akuzuar Kryeministrin Rama se është pas këtij procesi. Berisha tha se largimi i Thanzës dhe Ndrecës, vjen si pasojë e asaj që ish- Kryeministri e quajti si “urrejtja e Ramës për origjinën nga veriu”. “Rroftë reforma, poshtë drejtësia! Të dashur miq, dje, në emër të vetingut, dy gjykatës të Gjykatës së Lartë, Tom Ndreca dhe Admir Thanza, u nxorën jashtë sistemit të drejtësisë. Duke mbështetur në çdo rast zbatimin e ligjit, natyrisht, kurrë me dy dhe tre standarde, këtu nuk do të merrem me analizën e procesit të vetingut, që ka degraduar publikisht në një proces që zhvillohet në tërësi, me ndonjë përjashtim rastësor, me listë dhe si hakmarrje primitive dhe gjueti shtrigash e në shenjen e urrejtjes së Edvin Kristaq ndaj origjinës nga veriu apo asaj klasore të vetuarve”, shkruan ish- Kryeministri. Për Sali Berishën, vendimet e KPK- së janë diktuar nga Rama, i cili, sipas tij, paralizoi Gjykatën e Lartë. “Por, do të theksoj këtu se me vendimet e djeshme, krye- krye- kreu Edvin Kristaq Rama i dha goditjen e mëshirës dhe de facto asgjësoi apo paralizoi edhe Gjykatën e Lartë të vendit, dhe së bashku me të asgjësoi edhe sistemin universal tri shkallë kushtetues të Drejtësisë në Shqipëri dhe Kushtetutën e vendit e shndërroi në një letër pa vlerë. Pra, për të gjithë ata shqiptarë që i thonë Kushtetutës së vendit Kushtetutë dhe sistemit të Drejtësisë, sistem drejtësie, në Shqipëri, pushteti gjyqësor i ndërtuar sipas Kushtetutës, si në çdo vend të lirë të botës, në tri shkallë, ka rënë, dhe Kushtetuta ka vdekur. Sot, narkorepublika orelliane e Shqipërisë është i vetmi vend i planetit me sistem drejtësie me dy shkallë, pra, pa shkallë të tretë”, shkruan Berisha. Në komentin e tij, ish- kreu i PD thekson se me paralizimin e Gjykatës së Lartë dhe shndërrimit të Gjykatës Kushtetuese në një “kadavër”, këto pushtete janë transferuar në zyrën e Ramës. “Pas paralizës së plotë të Gjykatës së Lartë, me vendimin e djeshëm të vetoreve të Edivinit dhe pas grushtit të shtetit brenda shtetit dhe asgjësimit po me vetoret e Edvinit të Gjykatës Kushtetuese dhe shndërrimit të saj në një kadavër kushtetuese, të gjitha fuqitë e Gjykatës së Lartë dhe asaj Kushtetuese janë transferuar de facto në zyrat e kryekrye- kreut Edvin Kristaq Rama. Me këto akte që përmbysën Kushtetutën dhe vetë rendin kushtetues të vendit, Reforma e Drejtësisë e realizoi qëllimin e saj sorosjan, shndërrimin e Drejtësisë në Shqipëri, në degë të ekzekutivit të Edvin Kristaq Ramës”, shkruan ai.