Gjykatat, Meta: Qeveria dhe opozita duhet të bashkëpunojnë
Presidenti Meta i kërkoi dje qeverisë dhe opozitës të bashkëpunojnë për të kapërcyer ngërçin që po krijohet me institucionet e drejtësisë, siç janë Gjykata Kushtetuese dhe Gjykata e Lartë. “Sa u takon disa çështjeve që u takojnë zbatimit të Reformës në Drejtësi, e cila është një reformë e thellë, madhore dhe komplekse, duke shprehur mbështetjen time për ecurinë e kësaj reforme, dua t’u siguroj të gjithëve për përmbushjen e detyrimeve ligjore që ka Presidenti i Republikës për çështjet e drejtësisë në mënyrë më transparente. Po kështu, duhet të theksoj rëndësinë e bashkëpunimit midis qeverisë dhe opozitës për të tejkaluar çdo moment të vështirë apo të paparashikuar, i cili mund të verë në vështirësi funksionimin e institucionit të drejtësisë, krijimin e institucioneve të reja aq të domosdoshme që ato të mar- rin përgjegjësi në një kohë të shpejtë dhe të kenë mbështetje maksimale”, tha presidenti Meta i pyetur nga gazetarët. Në lidhje me marrëveshjen e detit mes Shqipërisë dhe Greqisë, kreu i shtetit kërkoi që ajo të bëhet sipas përcaktimeve kushtetuese. “Dua të theksoj angazhimin tim të plotë në respekt të Kushtetutës dhe të frymës konstruktive, që është shumë e rëndësishme të mbizotërojë në marrëdhënie me të gjithë fqinjët dhe pa dyshim edhe me Greqinë si një fqinj i veçantë dhe i rëndësishëm. Është e rëndësishme të kuptojmë që ky është një proces, i cili duhet të bazohet në barazinë e palëve në raport me të drejtën ndërkombëtare dhe së dyti edhe në respekt të Kushtetutës dhe të legjislacionit përkatës të çdo vendi”, tha Meta.