Rama: Ndjekje penale për ata që sorollatin qytetarët
Kryeministri Edi Rama tha se të gjithë ata zyrtarë që sorollatin qytetarët në sportele, do të shkojnë për ndjekje penale. Dje, kreu i qeverisë zhvilloi takimin e radhës me koordinatorët kombëtarë të Platformës së Bashkëqeverisjes, ku u dëgjuan edhe disa dëshmi të qytetarëve që kishin marrë shërbimin prej saj. Me lot në sy, zonja Hasmeta tha se kishte shkuar 7 herë në sportelin e Hipotekës së Tiranës dhe nuk merrte dot certifikatën. Ajo kishte mbaruar punë për 10 ditë pasi i ishte drejtuar platformës. “Është një rast, për fat të keq, jo i shkëputur. Është një rast tipik dhe dëshmia e zonjës vlen për të inkurajuar të gjithë ata që kanë më shumë se një vajtjeardhje në hipoteka, që të mos shkojnë më në hipotekë, por të drejtohen te Platforma, në mënyrë që ecejaku i tyre të marrë fund, problemi i tyre të zgjidhet. Por, me këtë rast, të identifikohen edhe personat që i prodhojnë këto tortura krejtësisht të paligjshme dhe t’i ndëshkojmë. Faktikisht, zonja dhe bashkëshorti i saj e kanë zgjedhur problemin, por personat që janë shkaktarë të problemit janë në proces ndëshkimor administrativ dhe do të vlerësohet deri në fund nga Task- forca antikorrupsion e Ministrisë së Drejtësisë, nëse jemi përballë një situate të veprës penale dhe pastaj, me gjasë, ata do të dërgohen në Prokurori”, tha Rama. Ai u bëri thirrje sërish qytetarëve që t’i drejtohen platformës për çdo problem që u krijohet në zyrat e shtetit. “Ti drejtohen platformës sepse kështu, me një gur, vrasim dy zogj, zgjidhim një hall, adresojmë një problem, por nga ana tjetër identifikojmë punonjësit në zyrat e shtetit që meritojnë t’iu tërhiqet veshi kur kanë gabuar pak apo të ndëshkohen administrativisht dhe të largo- hen nga puna kur kanë gabuar shumë apo të shkojnë për ndjekje penale kur nuk bëhet fjalë për një gabim, por për një faj”, tha Kryeministri. Ai tha se shumë shpejt do të bëhet dhe raporti i transparencës, i cili do të evidentojë abuzuesit me detyrën. “Për të gjitha këto raste do të ketë masa. Ne po punojmë për një format të ri të raportit transparent të masave për të gjithë ata që janë pengesë. Një pjesë sigurisht bëhen pengesë si raport i një kulture mizerabël që është krijuar për vite të tëra, një pjesë tjetër bëhen pengesë, sepse janë parazitë dhe një pjesë tjetër, sepse janë grabitqarë. Me këto dy kategoritë e fundit, ne kemi vetëm një rrugë dhe një gjuhë, largimin nga puna ose ndjekje penale. Nuk kemi asnjë rrugë tjetër”, tha Rama.