Trump ndryshon deklaratën për ndërhyrjen ruse në zgjedhje
“U ngatërrova kur thashë fjalinë, u besoj agjencive amerikane”
I gjendur nën një presion të madh për qëndrimin që ka mbajtur në konferencën për shtyp në Helsinki përkrah Presidentit rus, Vladimir Putin, Donald Trump tha se ka bërë një gabim në të folur kur përjashtoi Rusinë nga përgjegjësia për përzierjen në zgjedhje.
Kritikat e “kryqëzuan” Trump për hedhjen poshtë të zbulimeve të agjencive të tij të sigurisë dhe animin e tij nga Rusia. Por ja ku vjen mbrojtja. “Kam bërë një gabim në të folur”, tha Trump gjatë një takimi me kongresmenë amerikanë. “Fjalia që thashë ishte: Nuk shoh ndonjë arsye pse duhet të ishte Rusia ( ndërhyrësja në zgjedhje). Në fakt, unë doja të thosha: Nuk shoh ndonjë arsye pse nuk duhet të ishte Rusia. Jam ngatërruar. Se fjalia kishte dy pjesë mohuese. Për këtë”, tha Trump. Por në asnjë moment ai nuk e hodhi poshtë “suksesin” e takimit të tij, për të cilin mediat në të gjithë botën ishin në një mendje për përfundimin: “Trump 0 – Putin 1”. Ai e mbron në çdo rast takimin e tij me Presidentin rus Putin, pasi praktikisht tha në konferencën e Helsinkit se nuk mbështeste agjencitë amerikane të inteligjencës, por besonte deklaratat e Presidentit rus. “Shumë njerëz në skajet më të larta të inteligjencës e pëlqyen performancën e konferencës për shtyp në Helsinki”, tha Trump të mërkurën në mëngjes. “Putin dhe unë dis- kutuam shumë tema të rëndësishme në takimin tonë të mëparshëm. Ne u morëm vesh mirë, gjë që me të vërtetë shqetëson shumë urryes, që donin të shihnin një ndeshje boksi. Rezultate të mëdha do të vijnë!”, shkroi Presidenti amerikan. Trump u përpoq të pastronte polemikat kur tha se kishte gabuar gjatë konferencës së shtypit dhe pohoi se ai “ka besim të plotë dhe mbështetje për agjencitë e inteligjencës së Amerikës”. “Unë e pranoj konkluzionin e komunitetit tonë të inteligjencës se ndërhyrja e Ru- sisë në zgjedhjet 2016 ndodhi”, tha Trump gjatë një takimi me anëtarët e Kongresit në Shtëpinë e Bardhë, përpara se të shtonte në komentet e tij se: “por mund të jenë edhe njerëz të tjerë; ka shumë njerëz atje”, duke larguar sërish dyshimet nga Rusia.