SI MERRET TAPIA Vendimi i ri, legalizim për shtëpitë para 1991

Qeveria përfshin në legalizim edhe ndërtimet para 10 gushtit 1991, procedura që duhet ndjekur nga familjet dhe kur merret tapia për tokën e zënë

Qeveria ka zgjeruar kategoritë që do të legalizojnë shtëpitë pa leje. Gazet zbardh vendimin e djeshëm, i cili përfshin në procesin e legalizimeve edhe ndërtimet para vitit 1991.

Vendimi për “Përcaktimin e procedurës së kalimit të pronësisë e të regjistrimit të pasurive të paluajtshme, të ndërtuara deri më 10.8.1991 dhe të truallit funksional të tyre”, parashikon dhënien e tapisë për të gjitha shtëpitë që deri më sot kishin ngelur jashtë procesit.

KUSH PËRFITON

Sipas qeverisë, janë objekt trajtimi i këtij vendimi “ndërtimet e ngritura deri më 10.8.1991 dhe trojet funksionale të tyre, për të cilat nuk ka akte të fitimit të pronësisë. Përjashtimisht, nëse për truallin ka dokumentacion pronësie, procedurat e kalimit të pronësisë kryhen vetëm për ndërtesën”. Por cilat kategori përfitojnë? Qeveria ka përcaktuar se do të legalizojë ato ndërtime, të cilave iu mungon akti i fitimit të pronësisë dhe nga pikëpamja ndërtimore janë të përfunduara, me mure dhe me mbulesë. Pra, të përfunduara. Trualli që do të kalojë në pronësi, në rast se nuk është në pronësi, është “sipërfaqja e tokës nën ndërtesë, së bashku me oborrin përreth saj, që posedohet, efektivisht, nga subjekti kërkues”. Me procedurat e legalizimit do të merret ALUIZNI. Nga ana tjetër, qeveria përcakton se “kalimi i pronësisë së ndërtimit dhe truallit funksional, për sipërfaqet deri në 300 metra katrorë, kryhet pa pagesë”.

PROCEDURAT DHE AFATET

Në vendim janë parashikuar edhe afatet si dhe hapat që duhen ndjekur nga ata që do legalizojnë shtëpitë. Sipas qeverisë, procedura fillon “me kërkesë të subjektit/ subjekteve, pavarësisht nëse zona kadastrale i është nënshtruar ose jo regjistrimit fillestar sistematik”. Do të jetë ALUIZNI, ai që do evidentojë në terren ndërtimin dhe truallin funksional, duke verifikuar, paraprakisht, bazën e të dhënave të ndërtimeve pa leje, nëse për të është paraqitur aplikim për legalizim. Gjatë evidentimit në terren verifikohet edhe posedimi efektiv i ndërtimit nga subjekti përfitues. “Të dhënat e kërkesës dhe të evidentimit në terren bëhen publike për 30 ditë, në ambientet e njësisë administrative ku gjendet pasuria, në ambientet e ALUIZNI- t, ZVRPP- së si dhe në faqet përkatëse web”, thekson vendimi. Po ALUIZNI, do të vërtetojë nëse ndërtimi është ndërtim i ri apo është para vitit 1991. Tarifa që duhet paguar nga aplikuesit është 8000 lekë. “Për procedurën e ndjekur, subjekti përfitues paguan për llogari të ALUIZNI- t tarifën e shërbimit, në vlerën 8 000 ( tetë mijë) lekë për çdo kat ndërtimi, e cila përdoret për të përballuar shpenzimet e evidentimit në terren dhe shpenzimet e tjera të procedurës administrative. Kjo tarifë i njoftohet përfituesit menjëherë pas përfundimit të periudhës së afishimit nëse përmbushen kushtet për të përfituar kalimin e pronësisë”, thuhet në vendim. Nga ana tjetër, vendimi për kalimin e pronësisë miratohet brenda 20 ditëve nga administrimi i vërtetimit për pagesën e tarifës së shërbimit, por, në çdo rast, jo më herët se data e përfundimit të afatit të njoftimit publik. Qeveria saktësoi se “ALUIZNI, brenda 10 ditëve nga miratimi i kalimit të pronësisë, përcjell vendimin, së bashku me genplanin, për regjistrim pranë ZVRPPsë, e cila është e detyruar të kryejë regjistrimin brenda 10 ditëve nga administrimi i dokumentacionit”.

SIPËRFAQJA E TOKËS

Vendimi përcakton se toka që legalizohet është vetëm 300 metra. Pra, sa për funksionin e shtëpisë. Por në pikën 18 të vendimit parashikohen edhe përjashtime. “Me kërkesë të posaçme, subjektit mund t’i kalohen në pronësi pjesët e sipërfaqes shtetërore mbi masën e përcaktuar, deri në 500 metra katrorë. Përjashtimisht, nëse nga konfigurimi i truallit funksional rezulton se krijohen sipërfaqe të lira që tejkalojnë masën e 500 metrave katrorë dhe që nuk mund të shfrytëzohen më vete për ndërtime të reja, subjekti mund të përfitojë kalimin e pronësisë edhe për to”.

PARA EDHE PËR PRONARËT

Për tokën e zënë, ata që kanë shtëpi para 1991, pa dokumente, duhet të paguajnë. Vendimi parashikon se në çdo rast, për pjesët e sipërfaqes që kalohen në pronësi, subjekti paguan çmimin sipas hartës së vlerës së pronës. Këto para që arkëton shteti do të shkojnë 70 për qind në fondin e kompensimit të pronave dhe 30 për qind për llogari të ALUIZNI- t, për përballimin e shpenzimeve të evidentimit në terren dhe të shpenzimeve të tjera të procedurës administrative.