KALLËZIMI, SHKELJET E GJYQTARIT BANI

Gjyqtari i Gjykatës së Tiranës, Erjon Bani, është kallëzuar penalisht në Prokurorinë e Tiranës për veprën penale “shpërdorim detyre”. Është avokati Detar Hysi, i cili ka depozituar në Prokurori kallëzimin për Banin.

Sipas tij, Bani ka refuzuar të heqë dorë nga një çështje gjyqësore ku kërkohet ulja e dënimit për një shtetas, të identifikuar me inicialet A. B.. Sipas kallëzuesit, Bani ka qenë pjesë e trupës gjykuese që ka dhënë vendimin për dënimin e shtetasit A. B. me burg dhe ndaj nuk mund të shqyrtojë çështjen me objekt “Kërkesë për ulje dënimi” të tij. Mirëpo, gjyqtari Bani ka refuzuar disa herë që të heqë dorë nga çështja dhe madje i është përgjigjur palës kërkuese me gjobë për “fyerje të autoritetit të gjyqtarit”. Vetë avokati iu drejtua Gjykatës së Tiranës më parë duke kërkuar përjashtimin e gjyqtarit Bani nga çështja dhe me vendim të datës 13 korrik, gjyqtarja Shefkie Demiraj pranoi kërkesën e Hysit duke përjashtuar Banin nga çështja.

KALLËZIMI Sipas avokatit Hysi, gjyqtari Erjon Bani ka qenë anëtar i trupës gjykuese, e cila me vendimin e datës 3.102017 e ka deklaruar fajtor shtetasin A. B.. Bani, sipas kallëzimit, në kundërshtim me ligjin ka aplikuar vendime ekstraligjore “Gjyqtari Bani kërkon të mbajë me forcë një çështje ku ka qenë anëtar i trupit gjykues dhe është shprehur një herë me vendim. Ky gjyqtar, për raste analoge me objekt ‘ Ulje dënimi’ ka aplikuar vendime ekstraligjore. Ai thërret prokurorin në seancë, kur neni 63 i ligjit 8328 datë 16.04.1998 nuk e lejon. Mua, si mbrojtës ligjor më vendosi gjobë, vetëm se kërkova të hiqte dorë nga çështja dhe t’i hapte rrugë një gjykimi të drejtë dhe të paanshëm. Këto tregojnë haptazi që ky gjyqtar me dashje dhe me qëllime të tjera të errëta ka shpërdoruar detyrën. Nisur nga sa më sipër, kërkojmë: fillimin e procedimit penal; dërgimin para Gjykatës të shtetasit Erjon Bani për veprën penale ‘ shpërdorim detyre’”. në lidhje me kërkesën me objekt “Ulje dënimi për të dënuarit që plotësojnë kushtet e kërkuara”. Gjithashtu, avokati Detar Hysi vlerëson se thirrja e prokurorit në seancë gjyqësore për kërkesa të tilla është në kundërshtim me ligjin dhe në shkelje të Konventës Europiane për të Drejtat e Njeriut. “Në datën 3.7.2018 kemi kërkuar përjashtimin e gjyqtarit Bani nga çështja. Nga ana jonë është depozitar kërkesa për përjashtim të gjyqtarit, ku me vendimin nr. 642 datë 05.07.2018 të Gjykatës së Tiranës është vendosur ‘ mospranimi i kërkesës’ së shtetasit A. B. për përjashtimin e gjyqtarit Bani. Kjo është bërë me pretendimin se unë si mbrojtës ligjor nuk kam tagër përfaqësimi apo autorizim sipas kërkesave të nenit 19/ 4 të Kodit të Procedurës Penale. Nga ana ime është plotësuar kjo kërkesë më datë 11.07.2018. Në datën 12.072018, gjyqtari Erjon Bani nuk e vlerësoi me objektivet dhe në përputhje me ligjin kërkesën time për heqje dorë nga kjo çështje, duke shkelur çdo etikë profesionale dhe morale si gjyqtar, pasi shkaqet e mësipërme janë në përputhje me frymën e ligjit Procedural Penal dhe Kushtetues”, shkruhet në kallëzim.

ARGUMENTET “Në seancën e datës 12.07.2018, gjyqtari Bani më ka vendosur edhe një gjobë prej 10 mijë lekësh me pretendimin se unë kam fyer autoritetin e gjykatës. Duke vërejtur me shqetësim njëanshmërinë e këtij gjyqtari në gjykimin e kësaj çështjeje, si edhe duke vlerësuar mendimin e dhënë Kryetarit të Gjykatës, pse unë kam kërkuar përjashtimin e tij, ky gjyqtar ka referuar dy vendime të Gjykatës Kushtetuese Italiane, çka është në kundërshtim me nenin 42, 145 të Kushtetutës së Shqipërisë, nenin 6 të KEDNJ”, vijon më tej kallëzimi. Pra, sipas avokatit Detar Hysi, i cili ka mbrojtur edhe Nezar Seitin, gjyqtari Bani ka tentuar të mbajë me forcë një çështje për të cilën është shprehur një herë, ka gjobitur avokatin pasi ka kërkuar përjashtimin e tij nga trupa gjykuese dhe ka marrë vendime ekstraligjore për çështje të tilla. Ndërkohë, Gjykata e Tiranës dhe përkatësisht gjyqtarja Demiraj e ka vlerësuar si të bazuar në ligj kërkesën e Hysit për përjashtimin e gjyqtarit Bani nga çështja duke e pranuar atë.