“Skenari i atentatit”, Prokuroria apelon vendimin për deputetin Doshi
Prokuroria e Tiranës ka apeluar vendimin e Shkallës së Parë për shpalljen e pafajshëm për akuzën e “kallëzimit të rremë” të deputetit Tom Doshi. Bëhet fjalë për “skenarin” e atentatit ndaj ishdeputetit të PS- së në vitin 2016. Gjykata e Tiranës vendosi të shpallë të pafajshëm Tom Doshin, ndërsa dënoi vetëm Mark Frrokun dhe Durim Bamin me nga 1 vit burg. Sipas Gjykatës, dënimi i Mark Frrokut zbret në 8 muaj burgim për shkak të gjykimit të shkurtuar dhe Gjykata vendos ta lërë atë në shërbim prove. Ndërsa për Durim Bamin, i cili supozohej se do të ekzekutonte Doshin, shuhet dënimi prej 1 viti burg, pasi ka qëndruar përtej asaj kohe në paraburgim. Kujtojmë se procesi ka nisur që në vitin 2016 dhe është zvarritur së tepërmi. Prokuroria, e cila kishte kërkuar edhe dënimin e Tom Doshit me 1 vit burg, kërkon në Apel shfuqizimin e vendimit të dhënë më 4 korrik. VERSIONI I DOSHIT Sipas dosjes hetimore, Tom Doshi ka thënë se ka qenë Mark Frroku ai që e ka njoftuar për atentatin. Doshi i ka shpjeguar se nuk ndodhej në Shqipëri dhe për këtë arsye, ata e kanë lënë takimin, pasi ai është kthyer nga pushimet. Nga ak- tet e administruara, ka rezultuar se ky takim është zhvilluar nga fundi i muajit gusht 2014, në mjediset e hotel “Sh***” në Tiranë. Në këtë takim, i pandehuri Mark Frroku i ka bërë me dije të pandehurit Tom Doshi se ndaj tij po përgatitej të kryhej një atentat dhe këtë do ta ekzekutonte një shtetas me emrin Durim Bami. Sipas Mark Frrokut, shtetasit Durim Bami i ishte ofruar shuma prej 500 mijë eurosh për të kryer vrasjen. I pandehuri Frroku ka marrë përsipër gjithashtu që ta prezantojë të pan- dehurin Tom Doshi me personin që do të kryente vrasjen ( Durim Bami) me qëllim që ai të mësonte më shumë detaje për rrethanat e kryerjes së këtij atentati. Me ndërmjetësinë e të pandehurit Mark Frroku, takimi mes tyre dhe Durim Bamit është zhvilluar disa ditë më pas. Lidhur me këtë takim, Tom Doshi ka shpjeguar se Durimi i ka thënë se porosia për të realizuar vrasjen ndaj tij ishte dhënë nga Ilir Meta, në atë kohë kryetar i Kuvendit të Shqipërisë, nëpërmjet një personi të quajtur F. S..