Tensione në Kuvend, miratohet ligji, Izraeli bëhet shtet kombëtar i hebrenjve
Turqia kritikoi fuqishëm ligjin që miratoi Parlamenti i Izraelit. Ministria e Jashtme e Turqisë tha se ligji shkel të drejtën universale dhe të drejtat e arabëve izraelitë. “Fakti se ligji e cilëson të drejtën për vetëvendosje si të drejtë që zbatohet vetëm për hebrenjtë, është produkt i një mentaliteti të vjetruar dhe diskriminues”, tha ministria turke. Ibrahim Kalin, zëdhënës i Presidentit turk, Erdogan, tha se ligji është racist dhe përpjekje “për të fshirë ligjërisht” popullin palestinez nga vendi i tij.
Parlamenti i Izraelit ka miratuar një ligj të debatueshëm, duke rritur tensionet mes hebrenjve dhe pakicës arabe. Një ligjvënës arab është nxjerrë jashtë nga Parlamenti i Izraelit pas kalimit të legjislacionit që përshkroi vendin si shtet kombëtar i hebrenjve. Jamal Zahalka u dëbua nga Parlamenti për një muaj, pasi e përshkroi një ish- zyrtar të inteligjencës izraelite si një vrasës të fëmijëve palestinezë. Ai gjithashtu e quajti një politikan izraelit vrasës, gjatë debatit mbi kalimin e ligjit. Parlamenti i Izraelit miratoi legjislacionin e diskutueshëm, pavarësisht kritikëve që paralajmëruan se ai do të anashkalonte të drejtat e pakicave. Deklarata e pavarësisë së Izraelit, në vitin 1948, e përcaktoi natyrën e tij si një shtet hebraik dhe demokratik, një balancë delikate që vendi ka luftuar për ta mbajtur për 70 vjet. Kundërshtarët e projektligjit të ri thonë se ai e margjinalizon pakicën arabe të vendit prej rreth 20 për qind dhe gjithashtu e zvogëlon rëndësinë e gjuhës arabe nga përcaktimi “zyrtare” në atë “të veçantë”. Ligji kaloi me një mbështetje 62 deputetë pro dhe 55 kundër, me dy anëtarë që abstenuan. Legjislacioni, i përkufizuar si një ligj themelor, ka të ngjarë të përballet me një sfidë në Gjykatën Supreme. Qeveria thotë se projektligji, i miratuar në orët e para të mëngjesit pas debateve shumorëshe, thjesht do të përfshijë në ligj karakterin ekzistues të Izraelit. Kryeministri Benjamin Netanjahu e quajti kalimin e tij një moment historik në historinë e sionizmit dhe në historinë e shtetit të Izraelit. “Izraeli është shteti kombëtar i popullit hebre, i cili nderon të drejtat individuale të të gjithë qytetarëve të tij. E përsëris, ky është shteti ynë. Shte- ti hebre”, tha ai. Ayman Odeh, kreu i Listës së Përbashkët Arabe, nxori një flamur të zi dhe e mbajti atë gjatë fjalimit të tij, duke paralajmëruar për implikimet e ligjit. “Ky është një ligj i keq. Sot, unë do t’u duhet t’u tregoj fëmijëve të mi, së bashku me të gjithë fëmijët e qyteteve arabe palestin- eze ... se shteti ka deklaruar se nuk na kërkon këtu… Ka kaluar një ligj që na thotë se ne do të jemi gjithmonë qytetarë të dorës së dytë”, tha ai. Benny Begin, djali i ish- kryeministrit izraelit Menachem Begin, themeluesi i partisë “likud” të Netanyahu- t, abstenoi nga votimi.