Londra identifikon vrasësit me helmin “Novichok”: Ikën në Rusi
Policia britanike ka përdorur teknologjinë e njohjes së fytyrës për të identifikuar dy vrasës të dërguar për të helmuar Sergein dhe Julia Skripal me substancën “Novichok” dhe janë të sigurt se ata ikën në Rusi. Zbulimi ndez sërish debatin e përfshirjes së Rusisë në helmimin e ish- spiunit të dyfishtë rus, i cili jetonte në Britani, si dhe vajzës së tij, në një kohë kur një tjetër çift britanik u helmua me të njëjtën substancë pak kilometra larg Salisbury- t, ku ndodhi rasti i parë. Gruaja humbi jetën në spital. Autorët e helmimit të Skripal besohet të jenë anëtarë të Shërbimit të Inteligjencës ushtarake ruse GRU, dhe nuk ishin të njohur për shërbimet e inteligjencës britanike, MI6, deri në kohën e sulmit me agjentit nervor në Salisbury. Detektivët, sipas “Dailymail”, i kanë gjurmuar ata nga “Kopshtet e Mbretëreshës Elizabeth” në Salisbury, ku hodhën “Novichok” deri në një aeroport të Mbretërisë së Bashkuar, që besohet të jetë “Heathrow”. Duke përdorur teknologjinë e njohjes së fytyrës, Policia dhe shërbimet sekrete, gjatë orëve të kaluara në kamerat CCTV, kanë identifikuar dy spiunët e kërkuar tani për sulmin e 4 marsit. Ata gjithashtu e dinë se ata po udhëtonin nën “identitete të reja” drejt Rusisë. Një burim sigurie tha për CNN, se një stacion britanik i inteligjencës në Qipro kapi një mesazh të koduar dërguar në Moskë nga Britania e Madhe, ku thuhej se përfshihej fraza: “Paketa është dorëzuar”. Një avion “Aeroflot” u ndalua dhe iu nënshtrua një kërkimi nga agjentët e Forcave Kufitare britanike kur u ul në “Heathrow” më 30 mars të këtij viti, duke shkaktuar zemërim në Rusi. I njëjti avion fluturoi nga Londra në Moskë më 5 mars, e me sa duket shërbimet sekrete britanike besonin se autorët e krimit u larguan nga vendi me atë avion dhe po kërkonin ndonjë provë. Është thënë gjithashtu se agjencitë e spiunazhit kishin identifikuar me “flamur të kuq” ( person i rrezikshëm) një individ, i cili mbërriti në një fluturim nga Moska një ditë para helmimit të Skripal.