Formulari e afatet, nis kompensimi i pronarëve
Agjencia e Pronave hap aplikimin për kompensimin e pronarëve me toka të zëna nga ndërtimet pa leje. Emrat e përfituesve dhe dokumentet
Agjencia e Pronave ka hapur aplikimin për ndarjen e kompensimit për pronarët, tokat e të cilëve janë zënë nga ndërtimet pa leje.
Bëhet fjalë për pronarët, të cilët morën miratimin e kompensimit me anë të vendimit të fundit të qeverisë më datë 11 korrik të këtij viti. Gazeta boton emrat e përfituesve të ndarë sipas qyteteve. Në total, ndahen 700 mijë usd kompensim. Agjencia e Pronave njofton: “Procesi i pranimit të kërkesave të subjekteve përfituesve do të fillojë në datën 23/ 07/ 2018 dhe nuk do të jetë i kushtëzuar dhe i kufizuar në kohë. ATP fton të gjithë subjektet e interesuara, të paraqiten pranë zyrave të saj, në adresën Rruga ‘ Muhamet Gjollesha’, nr. 54, Tiranë, çdo ditë nga e hëna në të premte, për plotësimin e kërkesës për kompensim dhe dorëzimin e dokumenteve përkatëse”.
DOKUMENTET Subjekti kërkues ( subjekti përfitues/ trashëgimtari ligjor/ përfaqësuesi me prokurë), në momentin e plotësimit të kërkesës për kompensim, duhet të paraqesë kërkesën për kompensimin e pronës, sipas formatit tip që gazeta po boton sot. Nga ana tjetër, sipas listës së ATP- së, duhen paraqitur edhe: Dëshmia e trashëgimisë për të gjithë trashëgimtarët e ligjshëm të subjektit përfitues, sipas radhës së trashëgimtarëve, në përputhje me përcaktimet e Kodit Civil; Prokura e posaçme, e nënshkruar nga të gjithë subjektet që përfitojnë kompensim, ku si tagër i nevojshëm të jetë edhe e drejta për të tërhequr vlerën financiare, në emër të tyre. ( Në rastet kur nuk është e mundur të dorëzohet prokura e posaçme, secili bashkëpronar apo një pjesë e tyre, paraqesin kërkesë individuale apo të përbashkët për pjesën takuese në pronën që kompensohet. Në rastin e kërkesave individuale të secilit bashkëpronar apo të një pjese të tyre, për çdo kërkesë të kryer, paguhet tarifë shërbimi në vlerën 2 000 ( dymijë) lekë, pavarësisht se i përket të njëjtës pasuri të paluajtshme); vërtetimi origjinal i lëshuar nga një bankë e nivelit të dytë për hapjen e llogarisë bankare në emër dhe për llogari të subjektit përfitues, ku përcaktohet edhe numri i llogarisë bankare ( IBAN), ku do të transferohet vlera financiare e përfituar; Fotokopja e dokumentit të identifikimit si dhe mandatpagesa, që vërteton pagimin e tarifës së shërbimit në vlerën 2 mijë lekë. “Subjektet përfituese, kërkesa e të cilëve nuk është pran- uar për mungesë dokumentacioni gjatë procedurave të mëparshme, kanë të drejtë të riaplikojnë. Këto subjekte nuk paguajnë tarifë shërbimi, nëse provojnë pagimin e saj gjatë aplikimit të mëparshëm”, thuhet në njoftimin e ATP- së.