Rama: BE jep 11 milionë euro për agroturizmin
“S’janë kredi, por para në dorë, duhet një projekt i besueshëm”
Kryeministri Rama u kërkoi kryebashkiakëve që të ndihmojnë familjet në fshat që duan të investojnë në agroturizëm, për të përfituar nga fondet e Bashkimit Europian.
“Në vjeshtën e këtij viti, ne hapim programin e mbështetjes financiare të Bashkimit Europian dhe 11 milionë euro janë vetëm për të mbështetur familje apo individë në fshat, që duan të investohen në agroturizëm. Dhe janë jo kredi, por para në dorë për të cilat duhet një aplikim i besueshëm, duhet një projekt i besueshëm. Por ai që është rreziku ynë, është që neve paratë të na ngelen pa u disbursuar për shkak se nuk kemi aplikime të besueshme dhe për shkak se nuk kemi projekte të besueshme. Për këtë arsye, bashkëpunimi juaj me qeverinë e me të gjithë këta aktorë që janë përfshirë në këtë kornizë është i domosdoshëm, se është e mirëkuptueshme që ju nuk i keni të gjitha burimet njerëzore të afta për të bërë këtë proces nga fillimi në fund, por për këtë arsye është edhe ky program, për t’ju ndihmuar dhe në këtë drejtim”, tha Kryeministri në një takim të zhvilluar me kryebashkiakët në Sallën e Hartave në Kryeministri. Sipas tij, projekti i 100 fshatrave është krijimi i modeleve të zhvillimit në zonat rurale. “Ideja është që jo thjesht të përmirësojmë 100 fshatra dhe as që gjithçka që ne do bëjmë të jetë për 100 fshatrat, se ka mijëra fshatra të tjerë në Shqipëri, por të krijojmë edhe për veten tonë modele funksionale që të tregojnë rrugën se si ky zhvillim do të përhapet rrathë- rrathë. Nëse ne kemi modele të prekshme suksesi ekonomik dhe financiar të familjeve që jetojnë në fshat, falë mbështetjes së këtij programi, të jeni të sigurt që njerëzit nuk do të na presin më ne, por do të jenë vetë të nxitur për të vazhduar atë rrugë”, tha Rama. Ai i bëri thirrje kryetarëve të bashkive që të punojnë me familjet e emigrantëve që të investojnë në fshatin e tyre. Mbështetja juaj si kryetarë të bashkive është e domosdoshme, qoftë për të ndarë së bashku me përfaqësuesit e qeverisë të gjitha planet ekzistuese, qoftë për të identifikuar së bashku potencialet njerëzore në territor dhe qoftë për t’u organizuar së bashku për një projekt brenda këtij programi, që ka të bëjë me sensibilizimin e emigrantëve, të atyre që janë larguar nga fshati dhe që me siguri do të jenë të interesuar të vlerësojnë mundësinë e investimit në fshatin e tyre, në shtëpinë e tyre, në shtëpinë e prindërve, pasi nuk ka diskutim që investime të tilla të kursimeve të emigrantëve do të ishin me një normë fitimi shumë më të pëlqyeshme, sesa norma e fitimit nga puna e përditshme në emigracion”, u shpreh Kryeministri.