Legalizimet para 1991, Lame: 60 mijë familjet që do të marrin tapitë
Pse dështuan dy vendimet e 1995 dhe 2012 dhe çfarë duhet të bëjnë qytetarët që kanë shtëpitë pa tapi. Procedura e plotë
Janë rreth 60 mijë familje, që për arsye të ndryshme jetojnë në shtëpitë e tyre të ndërtuara para viteve 1991, por nuk kanë hipotekën.
Në një dalje për mediat, kreu i ALUIZNI- t ka sqaruar vendimin e fundit të qeverisë për regjistrimin e pasurive të pahipotekuara para 10 korrikut 1991. Lame e ka thjeshtuar titullin e vendimit, “Për regjistrimin e banesave të ndërtuara para vitit 1991”. Në fund të procedurës, të cilën kreu i ALUIZNI- t e sqaroi se do të fillojë në shtator, vendimi “Do të krijojë mundësinë e mijëra pronarëve, që, përmes regjistrimit të pronës së tyre, të mund ta bëjnë atë të qarkullueshme në treg, ta shesin apo ta japin me qira ligjërisht, ta fusin në tregun e pasurive të paluajtshme apo ta trajtojnë në tregun e kredimarrjes”. SITUATA DHE VENDIMET E VJETRA
Sipas Lames, për herë të parë, shteti shqiptar filloi procesin e regjistrimit të banesave në vitin 1995. Kjo u bë asokohe me VKM 432, dt. 14.08.1995, “Për procedurat e regjistrimit të pasurive të paluajtshme në zonën urbane të fshatit”. Ky vendim është aplikuar në atë kohë në masë minimale në disa zona rurale dhe, sikurse kuptohet nga vetë titulli, nuk e trajtonte problemin për të gjithë territorin e vendit, por ofronte një zgjidhje të pjesshme vetëm për fshatrat. Më pas është vijuar me VKM 608 datë 05.09.2012, i cili gjithashtu nuk e ka realizuar dot qëllimin e tij gjatë këtyre gjashtë viteve. “Arsyet e dështimit të këtyre dy vendimeve të kaluara lidhen së pari me mungesën e kapaciteteve njerëzore, por në shumë raste edhe të vullnetit apo neglizhencën e njësive të qeverisjes vendore, të cilat kanë qenë organet e ngarkuara me kryerjen e këtyre procedurave. Së dyti, për sa i përket VKM nr. 608/ 2012, shkaqet lidhen edhe me burokratizimin e tepruar të procedurës dhe mbi të gjitha me qasjen jorealiste ndaj problemit”, theksoi kreu i ALUIZNI- t.
KUSH PËRFITON “Vendimi i fundit i Këshillit të Ministrave shërben si bazë ligjore për dhënien e dokumentit të pronësisë pronarëve të objekteve të ndërtuara para vitit 1991, në të gjitha ato raste kur ky dokument mungon. Pra, qëllimi i këtij vendimi është të formalizojë një kategori pasurish të paluajtshme, të cilat edhe pse fizikisht ekzistojnë dhe zotërohen prej dekadash ( herë- herë edhe prej shekujsh), pronarët e tyre nuk kanë pasur dokumentacion të mirëfilltë pronësie, duke mos i gëzuar asnjëherë ligjërisht. Mjafton të kujtoj këtu absurdin që edhe qytete si Gjirokastra, Shkodra, Berati, Elbasani apo Korça, i kanë ende të papajisur me dokumente pronësie shumicën e pronarëve të banesave në lagjet mesjetare të tyre”, theksoi kreu i ALUIZNI- t. ÇFARË DO LEGALIZOHET Sipas kreut të ALUIZNI, risitë kryesore të vendimit të miratuar së fundmi janë: 1. Lehtësimi i barrës së aplikuesit, nga detyrimet dhe dokumentacioni i tepërt, ( aplikuesi tanimë do të duhet të paraqesë vetëm kërkesën pranë ALUIZNI- t);
2. Zgjidhja e të gjithë pamundësisë së de- ritanishme, për të provuar periudhën e ndërtimit ( para datës 10.8.1991), gjë që ka penguar finalizimin e procedurës;
3. Kalimi i pronësisë së truallit të ndërtesës falas deri në 300 metra katrorë dhe mundësia për të blerë sipërfaqet mbi këtë masë.
“Numri i ndërtimeve që mendohet të trajtohen nga ky vendim është 40- 60 mijë. Duhet theksuar se asnjëherë nuk është bërë një evidentim i plotë dhe i saktë i këtyre objekteve dhe, si rrjedhim, shifra reale mund të jetë edhe më e lartë se ajo e mësipërme”, theksoi Lame. Shifra e dhënë prej tij është vërtet shumë e madhe, po të kihet parasysh edhe procesi i legalizimit për ndërtimet pas 1992, që arrin në më shumë se 350 mijë familje.
AFATET DHE ÇFARË DUHET TË BËJNË QYTETARËT Lame qartësoi se duke filluar nga shtatori, të gjithë qytetarët e interesuar për regjistrimin e banesave të tyre, të ndërtuara përpara vitit 1991, do të mund të paraqiten pranë sporteleve të ALUIZNI për të aplikuar. “Ndërkohë, mund të fillojnë nga grumbullimi i dokumentacionit që ata posedojnë, leje ndërtimi të vjetra, akte pronësie, skica genplane, akte shitblerjeje apo posedimi, vendime të vjetra të Këshillave Popullore apo dokumente të tjera provuese të çdo lloji dhe kohe”. Sipas tij, këta dy muaj do shërbejnë për të organizuar stafet dhe për të krijuar pranë secilës drejtorie rajonale të ALUIZNI- t nga një sektor që do të merret ekskluzivisht me ndjekjen dhe zbatimin e kësaj VKM- je.