PD: Veliaj i jep 100 milionë lekë kompanisë debitore. Bashkia: Kompania s’ka detyrime
Partia Demokratike akuzoi Bashkinë e Tiranës se ka dhënë një tender korruptiv për uniformat e Policisë Bashkiake. Zëdhënësja e selisë blu, Ina Zhupa, u shpreh se Bashkia e Tiranës ka shpallur fituese të një tenderi 100 milionësh për uniformat e policëve bashkiakë një kompani nën sekuestro për mospagim taksash dhe me vetëm 1 punëtor. “Është fakt se Erion Veliaj i ka dhënë 100 milionë lekë një kompanie që nuk paguan tatimet dhe për këtë arsye është nën sekuestro. Zyra e Tatimeve e provon këtë”, u shpreh Zhupa. Sipas selisë blu, tenderi ka qenë fiktiv dhe i paracaktuar. “Aty thuhet se kompania fituese ‘ Vojsava Zenelaj’ është me statusin ‘ nën mbledhje me forcë’, çka tregon se kompania nuk ka paguar tatimet dhe duhet të ishte skualifikuar menjëherë! Duke i dhënë 100 milionë lekë një kompanie që është nën sekuestro për mospagim tatimesh, Bashkia e Erion Veliajt ka shkelur disa ligje dhe vendime qeverie. Siç trego- het në dokument, kjo kompani duhet të ishte skualifikuar, sepse janë dy ligje dhe dy vendime që ndalojnë shpalljen fitues të kompanive që nuk paguajnë taksa! Është fakt se tenderi për 100 milionët është fiktiv, sepse në të ashtuquajturën garë kanë marrë pjesë vetëm 2 kompani: kjo që ka fituar, ‘ Vojsava Zenelaj’ dhe një kompani tjetër ‘ Muça ShPK’, që vetëm sa ka futur letrat për fasadë, por nuk ka bërë asnjë ofertë”, u shpreh Zhupa. Bashkia e Tiranës reagoi ndaj kësaj akuze, duke i cilësuar si të pavërteta deklaratat e bëra nga zëdhënësja e PD- së në lidhje me dhënien e një tenderi një kompanie me detyrime tatimore të papaguara. Bashkia e Tiranës sqaron se kur është bërë tenderi, të cilit i referohet Partia Demokratike në deklaratën e saj, kompania në fjalë ka rezultuar pa detyrime në tatime. “Sipas këtij institucioni, këtë e vërteton edhe vërtetimi që kjo kompani ka dorëzuar së bashku me dokumentet”, thuhet në reagimin e Bashkisë, që prezanton dhe dokumentin në fjalë.