Rama- Basha përplasen për gjykatat, Zaganjori kalon vetingun
"Politikanët kanë frikë nga sundimi i ligjit, prandaj nuk punuan"
Në Shqipëri, i ngarkuari me punë në ambasadën e Shteteve të Bashkuara në Tiranë, David Muniz, e konsideroi sot "një dështim i të gjitha partive në Parlament", moskalimin dje në seancën e fundit të Parlamentit për këtë sesion, të ndryshimeve ligjore që do të sillnin zhbllokimin e regjistrimit të studentëve të rinj për këtë vit akademik në Shkollën e Magjistraturës dhe emërimin e të porsadiplomuarve. Komentet e tij, zoti Muzin i bëri në një deklaratë për "Zërin e Amerikës".
Shumica dhe opozita nuk mundën të bashkonin dje votat e tyre për t'i dhënë zgjidhje ngërçit të krijuar me Shkollën e Magjistraturës për shkak të vonesave në ngritjen e institucioneve të reja të parashikuara nga Reforma në Drejtësi. Ndryshimet e propozuara nga socialistët synonin që në mungesë të Këshillit të Lartë Gjyqësor dhe Këshillit të Lartë të Prokurorisë, të jetë vetë Shkolla e Magjistraturës që të realizojë pranimet e reja, ndërsa emërimet për gjyqtarët dhe prokurorët, të bëhen nga KLD aktuale dhe Prokurorja e Përgjithshme. Por ky propozim u kundërshtua nga opozita, ndërsa shumica e vetme nuk i kishte 84 votat e nevojshme për miratim.
Në përgjigje të interesimit të Zërit të Amerikës, zoti Muniz u shpreh se bëhej fjalë për "një amendim të thjeshtë të ligjit për statusin e gjyqtarëve dhe prokurorëve për të përmbushur një kërkesë bazë të një sistemi drejtësie funksional, i cili lejon që studentë të rinj të hyjnë në Shkollën e Magjistraturës. Shkolla e Magjistraturës përgatit brezin e ardhshëm të gjyqtarëve dhe prokurorëve të Shqipërisë - jashtë ndikimit politik - në mënyrë që shqiptarët më në fund të gjejnë drejtësi në gjykatat e tyre. Politikanët shqiptarë - vijoi më tej i ngarkuari me punë në ambasadën amerikane - kishin mundësinë ta ndërmerrnin këtë hap të thjeshtë përpara dhe të hapnin dyert për një klasë të re studentësh, por nuk e bënë këtë". Sipas tij, "procesi i rivlerësimit të gjyqtarëve dhe prokurorëve po ecën më shpejt dhe Shqipëria ka nevojë për gjyqtarë dhe prokurorë të rinj, që do të mbrojnë sundimin e ligjit. Me sa duket, politikanët kanë frikë nga sundimi i ligjit dhe prandaj nuk punuan së bashku për të mbështetur Shkollën e Magjistraturës dhe Reformën në Drejtësi", përfundon reagimi i të ngarkuarit me punë të ambasadës amerikane.
Dje duke shpjeguar qëndrimin e partisë së tij për këtë çështje, kryetari Lulzim Basha deklaroi se, sipas tij, ligji për Shkollën e Magjistraturës "është aprovuar në mënyrë të tillë që pasi Kryeministri ta kapte Shkollën e Magjistraturës, asnjë parti tjetër të mos kishte mundësi t'ia hiqte nga duart dhe kjo është arsyeja pse ligji është me 3 të pestat". Sipas tij, në bordin drejtues, Kryeministri ka vënë njerëzit e tij, të cilët po ashtu kanë emëruar të përzgjedhurit e qeverisë. "Arsyeja e kapjes së Shkollës së Magjistraturës - u shpreh zoti Basha - është që ta shndërrojë atë në një farë kursi partiak ku të seleksionohen kandidaturat, sipas preferencave të Edi Ramës dhe këta të jenë pas 3 vitesh gjyqtarë, prokurorë të ardhshëm. Pra, synon një kapje afatgjatë të sistemit". Por, sipas zotit Basha, problemet e krijuara nga Reforma në Drejtësi janë më të thella, duke iu referuar bllokimit të Gjykatës Kushtetuese dhe situatës thuajse të njëjtë drejt së cilës po shkon dhe Gjykata e Lartë e duke propozuar një paketë me 7 pika si rrugëzgjidhje. Gjykata e Lartë ka mbetur me 6 nga 19 anëtarë që duhet të kishte. Tre gjykatës të saj janë shkarkuar gjatë procesit të rivlerësimit.