Rama dhe Basha përplasen në distancë për bllokimin e gjykatave nga vetingu
Kryeministri: Po mbetemi pa gjykata? Jo! Më mirë djepi bosh se shejtani brenda. Kreu i PD: Djepi bosh i duhet kryeshejtanit
Kryeministri Rama dhe kreu demokrat Basha kanë replikuar dje në distancë për fatin e Gjykatës Kushtetuese dhe Gjykatës së Lartë, pas shkarkimit të disa gjyqtarëve nga KPK.
Ishte Kryeministri Rama që përmes një statusi në "Facebook", u shpreh se vendi nuk po mbetet pa gjykata të larta, por po shpëton nga organizma të kancerizuar. "Po mbetemi pa gjykata të sipërme? Jo! Po operojmë organizma të kancerizuar që e degraduan deri në kockë drejtësinë. Më mirë djepi bosh se shejtani brenda! Ky pastrim është shpëtim për dekada e breza që vijnë, rilindja e këtyre gjykatave është vetëm çështje e më pak se një viti", shkruan Rama në "Facebook". Këtij qëndrimi të Kryeministrit Rama iu përgjigj menjëherë kreu i opozitës, Lulzim Basha, po përmes rrjetit social "Facebook". Basha shkruan se Gjykata Kushtetuese jashtë funksioni i duhet Kryeministrit për të mbrojtur aferën me T eatrin Kombëtar apo akuzat për ministrat e tij. "Djepi bosh i Gjykatës Kushtetuese i duhet kryeshejtanit për të mbrojtur mega- aferën 200 milionë euro me grabitjen e Teatrit Kombëtar. Ndërsa shejtanët në djepin e Prokurorisë iu duhen për të mbrojtur lidhjet me krimin dhe aferat korruptive, nga Tahiri te Xhafaj, nga Dako te Veliaj, nga Gjiknuri tek Ahmetaj, nga Sejdini te Rroshi me shokë", përgjigjet Basha.
VETINGU
Gjykata e Lartë ka mbetur me 6 nga 19 anëtarë që duhet të kishte. Tre gjykatës të saj janë shkarkuar gjatë procesit të rivlerësimit. Ndërsa kryetari i saj, Xhezair Zaganjori, u rikonfirmua dje, ndonëse ndaj tij në relacionin e Komisionit të Pavarur të Kualifikimit u hodhën hije dyshimi mbi pasurinë e deklaruar, ndërsa opozita ka akuzuar qeverinë se po kontrollon procesin e vetingut, duke skualifikuar gjyqtarë dhe prokurorë të caktuar. Sipas opozitës, vendi mund të mbetet edhe pa Gjykatë të Lartë dhe Gjykatë të Apelit. Menjëherë pas përfundimit të seancës së fundit plenare, në një reagim në "Facebook", ka reaguar Kryeminsitri Edi Rama. "Vetingu po vepron në pavarësi të plotë e monitorim ndërkombëtar. Fletërrufetë kundër vetingut janë dëshpërimi i atyre që e mbushën me llum Pallatin e Drejtësisë! Loja mbaroi. Gjykatat e sipërme do pastrohen deri në fund e do ringrihen për ta bërë më në fund drejtësinë Drejtësi", shkruan Rama. Kreu demokrat akuzoi maxhorancën se ka ndërhyrë në procesin e vetingut, duke bërë një kualifikim selektiv të gjyqtarëve dhe prokurorëve. "Ky proces është kritikuar qartë nga ONM për raste të veçanta dhe kritikat nuk janë marrë parasysh dhe për ne rezulton me standarde të dyfishta. Maxhoranca e ka kapur plotësisht vetingun. Për të njëjtën shkelje një gjyqtar dhe një prokuror e largojnë, dhe për të njëjtën shkelje tjetrin e mbajnë. Pse?! Sepse është në listën e bardhë të Edi Ramës, jo në atë të zezën e Ramës", tha Basha. Në mënyrë të përsëritur në tri seancat e fundit parlamentare të këtij sesioni, maxhoranca kërkoi të arrinte një konsensus me LSI, por dhe me Partinë Demokratike, për të bërë 84 vota që kërkon miratimi i ligjit për Shkollën e Magjistraturës, i cili do t'u hapte rrugë regjistrimeve të reja për gjyqtarë dhe prokurorë për vitin e ri akademik.