Basha- Roth: Opozita, e gatshme të kontribuojë në mënyrë konstruktive
Kryetari i Partisë Demokratike, Lulzim Basha, i shprehu ministrit gjerman të Shtetit për Çështjet e Europës se opozita është e gatshme të bashkëpunojë në mënyrë konstruktive. "Lideri i opozitës shprehu bindjen se këto probleme madhore nuk zgjidhen me korrigjime sipërfaqësore, por me një qasje tërësore e të mirëmenduar. Për këtë zgjidhje, Lulzim Basha siguroi ministrin gjerman të Shtetit, përgjegjës për Europën, se opozita është e gatshme të kontribuojë në mënyrë konstruktive. Kryetari i Partisë Demokratike, Lulzim Basha, i shprehu ministrit gjerman për Europën, Michael Roth, besimin se mbështetja dhe angazhimi i Gjermanisë janë shumë të rëndësishëm për Shqipërinë", thuhet në njoftimin e zyrës së shtypit të PD- së për takimin e ministrit Roth me kryedemokratin Basha. Kreu i PD- së falënderoi ministrin gjerman për mbështetjen që Shqipëria mori nga qeveria gjermane në procesin e integrimit. "Duke e falënderuar ministrin Roth për angazhimin e tij personal që çështja e Shqipërisë të mos hiqej nga axhenda e vendeve anëtare gjatë Samitit të Luksemburgut, në fund të qershorit, zoti Basha tha se me refuzimin që qeveria po i bën marrjes në konsideratë të kushteve të vendosura për Shqipërinë, rrezikon që edhe vitin tjetër vendit të mos i hapen negociatat. Me një qeveri të lidhur me krimin, Shqipëria e ka të pamundur të bëjë progres në rrugën drejt BE- së", është shprehur Basha. Kreu demokrat u ndal gjatë takimit në mënyrë të detajuar te Reforma në Drejtësi, e cila, sipas tij, me ndryshimet dhe amendamentet e bëra nga qeveria është kthyer në padrejtësi, në pushtet ndëshkues në duart e qeverisë. Basha e njohu ministrin gjerman me 7 propozimet e opozitës për zgjidhjen e kolapsit të krijuar nga ndërhyrjet politike për kapjen e drejtësisë.