FATION BINJAKU Qeveria konfirmon Berberin, Seminin dhe Pavlin në GJEND
“U konsultuam me panelin këshillues të KiE për tre kandidatët”
Këshilli i Ministrave ka publikuar dje zyrtarisht emrat e tre kandidatëve, të cilët janë dërguar në Asamblenë Parlamentare të Këshillit të Europës, për postin e anëtarit të Gjykatës Europiane për të Drejtat e Njeriut.
Ashtu siç “Panorama” publikoi ditën e enjte, tre kandidatët e përzgjedhur për postin e gjyqtarit në Strasburg janë: ish- anëtari i Gjykatës Kushtetuese, Sokol Berberi, juristi i Fondacionit Shoqëri e Hapur, Darian Pavli dhe pedagogia e Magjistraturës, Mariana Semini. Në njoftimin e saj qeveria bën të ditur se 16 aplikantët i janë nënshtruar dhe një procesi vetingu, i cili nuk është kryer nga organi i vetëm që e ushtron këtë kompetencë sipas Kushtetutës, që është Komisioni i Pavarur i Kualifikimit. Por në njoftim nuk jepen të dhëna më të detajuara se si dhe kush e ka kryer vetingun.
PËRZGJEDHJA Më tej bëhet e ditur se Sekretari i Përgjithshëm, Engjell Agaçi, ka ngritur një komision ad hoc me drejtues të drejtorive në Kryeministri, të cilët kanë bërë vlerësimin e dosjeve dhe intervistimin e kandidatëve. Kryetari i Komisioni ka qenë Artur Metani, drejtor departamenti në Kryeministri, Skënder Kaçupi, përgjegjës departamenti në Fakultetin e Drejtësisë. Kestrin Katro, zv. dekane e Fakultetit të Drejtësisë, Majlinda Dhuka, drejtoresha në Kryeministri dhe Armand Skapi, drejtori në MEPJ. “Pas realizimit të fazës konsultative me Panelin Këshillues të Komitetit të Ministrave të Këshillit të Europës, Këshilli i Ministrave propozon, për pozicionin e gjyqtarit të Shqipërisë në GJEDNJ, listën me 3 kandidatë”. Në njoftimin e qeverisë thuhet se: “Z. Sokol Berberi - jurist me përvojë të spikatur në fushën e së drejtës, anëtar i Gjykatës Kushtetuese ( prill 2007 - shtator 2016), mbajtës i titullit “Doktor”, profesor në disa disiplina të së drejtës, kontribuues në përafrimin e legjislacionit shqiptar me Konventën Europiane të të Drejtave të Njeriut etj.. Z. Darian Pavli - jurist me 15 vjet përvojë në dizenjimin, koordinimin dhe zbatimin e aktiviteteve që promovojnë mbrojtjen e të drejtave të njeriut në Nju- Jork, Tiranë ( Open Society Justice Initiative, Human Rights Watch. znj. Marjana Semini - juriste me përvojë të spikatur në fushën e së drejtës; mbajtëse e titullit “Profesor i asociuar”, profesore e brendshme në Shkollën e Magjistraturës për 20 vjet dhe drejtore e saj ( 2009- 2013)”.