Spitali nën ujë, reshjet e shiut përmbysin 2 reparte
Ujësjellësi: Kolektorër janë në rregull. Situatë paniku te pacientët, uji vërshoi korridoreve
Reshjet e dendura të shiut, dy ditë më parë, përmbytën repartin e imazherisë dhe atë të fizioterapisë në Spitalin e Shkodrës.
Kjo përmbytje fillimisht krijoi panik te pacientët, pasi uji vërshoi nëpër korridore. Drejtoresha e spitalit, Teuta Rrjolli, u shpreh dje se përmbytja erdhi si shkak i bllokimit të kolektorëve të ujit jashtë mjediseve të spitalit. "Nuk ka asnjë nevojë që të ketë panik te qytetarët apo pacientët. Gjithçka funksionon normalisht në Spitalin e Shkodrës. Përmbytja nuk ka ardhur si shkak i ndonjë problemi të spitalit të Shkodrës, por ka ardhur për shkak të bllokimit të kolektorëve. I gjithë stafi është vënë në gatishmëri, duke u munduar që të largojë ujin. Prezencë uji ka pasur te reparti i imazherisë dhe fizioterapisë. Kjo ka ardhur për shkak se nga sa më raportuan edhe teknikët, kolektorët e jashtëm kanë qenë të bllokuar. Sasia e madhe e ujit, por edhe papastërtitë nga qeset plastike apo mbetje të tjera, kanë bërë që të ketë çarje të tubave dhe më pas uji të përfundojë në mjediset e spitalit. Megjithatë, ne jemi angazhuar me të gjitha forcat tona, duke e stabilizuar situatën", shprehet Rrjolli. Sipas saj, nuk ka asnjë pajisje të dëmtuar apo jashtë funksionit. Mësohet se fizioterapia ndodhet një kat nëntokë dhe ka pasur edhe më përpara përmbytje, ndërsa për imazherinë është hera e parë që përmbytet si pasojë e vërshimit të ujërave nga reshjet e shiut. "Është hera e parë", u shpreh drejtoresha e Spitalit të Shkodrës. Rrjolli shtoi gjithash- tu se të paktën për imazherinë po mendohet që të krijohet një rrugë e dytë e kalimit të ujit në rast se kolektorët bllokohen sërish, në mënyrë që ai repart të mos përmbytet. Ndërkohë, drejtori i Ujësjellës Kanalizime në Shkodër, Mark Molla, mohoi që përmbytja në Spitalin e Shkodrës të ketë ndodhur për shkak të bllokimit të kolek- torëve të ujit. Molla thotë se kolektorët kanë qenë në funksionon dhe madje për të bërë të mundur kalimin e ujit më shpejt, janë hapur edhe pusetat. Sipas tij, kanalizimet dhe kolektorët kanë funksionuar normalisht. "Nuk e di arsyen e përmbytjes në spital, por kolektorët kanë qenë në rregull", deklaroi drejtori Molla.