Nga rroga te pasuria e besimi fetar, zbulohen 44 pyetjet e Censusit të ri të Qeverisë
Pyetje me detyrim për të treguar vitet e bashkëjetesës, nga elektroshtëpiaket te tualeti që keni në shtëpi
Qeveria ka përgatitur projektligjin për të zhvilluar censusin e popullsisë dhe banesave në Shqipëri për vitin 2020. Nisma është dërguar për konsultim në ministritë e linjës dhe në institucionet përkatëse.
Projektligji do të shoqërohet me një pyetësor zyrtar, i cili përmban në total 44 pyetje. Midis pyetjeve ka dhe shumë të tilla me “spec”, si dhënia e informacionit të detajuar të muajit dhe vitit kur një person është martuar si dhe detajimi me muaj dhe viti konkret kur ka nisur bashkëjetesën. “I/ e martuar, Specifikoni datën e martesës aktuale- muaji dhe viti. Në një bashkëjetesë, Specifikoni datën e fillimit të bashkëjetesës aktuale – muaji- viti”, thekson pyetësori. Po ashtu, në pyetësor janë pyetjet që kanë hasur kundërshti gjatë regjistrimit të popullsisë në vitin 2011. Qytetarët do të kenë tri alternativa për t’iu përgjigjur pyetjes se çfarë shtetësie kanë. Ata mund të zgjedhin të deklarohen si shqiptarë ose të specifikojnë një shtetësi tjetër. Por kanë edhe alternativën të deklarohen pa shtetësi fare. Po ashtu, pyetësori do të përmbajë pyetje për gjuhën amtare, ku jepen dy alternativa gjuha shqipe dhe një zgjedhje tjetër. Në kategorinë e pyetjeve më deklarim të lirë, jo të detyrueshme, është pyetja për përkatësinë e grupit etnik, të cilit qytetarët banues në Shqipëri i përkasin. Por kësaj pyetjeje i është lënë dhe alternativa “preferoj të mos përgjigjem”. E njëjta mundësi është lënë dhe për besimin fetar. Qytetarët do të lihen të lirë nëse duan apo jo të tregojnë cilit besimi fetar i përkasin. “A i përkisni ndonjë besimi fetar? Deklarim i lirë, jo i detyrueshëm; 1. Specifiko: 2. Nuk i përkas ndonjë besimi fetar, por jam besimtar; 3. Nuk i përkas ndonjë besimi fetar dhe nuk jam besimtar: 4. Preferoj të mos përgjigjem”, thuhet në projekt- pyetësorin e censusit të vitit 2020.
EKONOMIA Qytetarët do duhet të japin përgjigje të detajuara sesi i sigurojnë të ardhurat vjetore për ekonomitë e tyre familjare. Nëse të ardhurat i sigurojnë nga puna apo janë të vetëpunësuar, kanë prona apo investime, si të ardhurat nga qiratë apo llogaritë e kursimit. Marrin pension apo ndihmë sociale, apo marrin para nga familjarët që janë jashtë shtetit. Po ashtu, në pyetësor qytetarët do të kenë mundësi dhe të deklarojnë nëse e sigurojnë jetesën “i mbajtur nga një person tjetër”. Në këtë pyetësor nuk mungojnë dhe pyetjet për orenditë shtëpiake, nga soba, lavatriçja, bolieri elektrik, deri te linja e internetit në shtëpi. Po ashtu, edhe mënyra e ngrohjes nga stufa me dru apo qymyr e deri te paneli diellor. BANESAT Në censusin e ri që do të kryhet në vitin 2020, qytetarët do të pyeten më detyrim që të japin informacion të saktë për llojin e banesës ku jetojnë dhe statusin e pronësisë së saj. Nëse janë pr- onarë me akti ligjor, paguajnë apo jo kredi. Janë në proces të marrjes së tapisë apo legalizimit, apo janë qiramarrës. Në rast se jetojnë me qira, atëherë duhet të specifikojnë se kush është pronari i banesës, enti shtetëror, person fizik ose familjar, kompani private apo ish- pronarë para viti 1945. Por censusi do të hyjë dhe në specifikime të tjera si për llojin e tualetit që kanë qytetarët në shtëpi. “1. WC me ujë të rrjedhshëm brenda banesës; 2. WC me ujë të rrjedhshëm jashtë banesës, por brenda ndërtesës; 3. WC me ujë të rrjedhshëm jashtë ndërtesës; 4. Tualet i llojit tjetër; 5. Asnjë lloj tualeti”, thekson pyetësori.