Ulsi Manja: Pas gjyqtarëve, veting politikanëve
"SPAK- u, spastrim i të korruptuarve në nivele të larta"
Pas Gjykatave dhe Prokurorive, gjatë këtij viti mund të kemi dhe boshatisjen e Parlamentit dhe kupolës së administratës. Paralajmërimi vjen nga kryetari i Komisionit të Ligjeve, Ulsi Manja. Gjatë një interviste për "Klan Plus", sipas të cilit, ai thotë se me ngritjen e Byrosë Kombëtare të Hetimit do të nisë dhe spastrimi i politikës. "Byroja Kombëtare e Hetimit do të ngrihet 2 muaj pas ngritjes së KLPsë. Janë institucione të posaçme për të luftuar korrupsionin dhe krimin e organizuar në radhët e zyrtarëve të nivelit të lartë. Këtu nuk ka dallim. Pa dallim. Do ketë spastrim të të gjithë niveleve të politikës, administratës së lartë nga elementët e korruptuar. Pa dallim. Për këtë e kemi ngritur SPAK- un. Duroni!", thotë Manja për "Klan Plus". Ndërsa parlamentarët kanë marrë pushimet, vetingu po vazhdon punën me filtrimin e kandidatëve për KLGJ e KLP. Me skualifikimin e një pjese të tyre, kryesisht për shkak se nuk justifikojnë pasuritë, pas shtatorit mund të kemi një rihapje gare për kandidatë të tjerë. "Në momentin që KPK do të përfundojë procesin e vetingut me të gjithë kandidatët për KLP e KLGJ, listat përkatëse me ata që e kalojnë, do t'i vihen në dispozicion Gjykatës së Lartë dhe Prokurorisë së Përgjithshme. Në rast se do të ketë vakanca sipas niveleve, ligji e ka përcaktuar rishpalljen e garës. "Pretendimet për favorizim politik të gjyqtarëve apo prokurorëve të caktuar, Ulsi Manja i sheh të pabaza. "KPK as më shumë e as më pak po zbaton Kushtetutën dhe ligjin. Natyrisht janë autonomë në vendimmarrjen që marrin", sqaron kryetari i Komisionit të Ligjeve, Ulsi Manja. Kryetari i Komisionit të Ligjeve, Ulsi Manja akuzoi pak ditë më parë opozitën se kërkon të zhbëjë Reformën në Drejtësi dhe vetingun, duke kërkuar dialog me kushte. Në një prononcim për mediat, Manja tha se Kushtetuta ka mekanizma për të zhbllokuar këtë situatë. "Dialog me kushte për t'u rikthyer në korrikun e 2016- s për të zhbërë Reformën në Drejtësi dhe vetingun, nuk ka, harrojeni, se nuk ka. Nuk ka kolapsim të sistemit të drejtësisë sepse Kushtetuta dhe ligjet e reformës kanë përcaktuar qartësisht mekanizmat e zhbllokimit. Këtij kolapsi, siç pretendon opozita, ia ka dhënë recetën Kushtetuta dhe ligjet e reformës. Po Kushtetuta, në fakt. nuk ka dhënë recetë për kapsllëkun politik që ka opozita, e cila tani thotë Reforma në Drejtësi ka dështuar dhe hajde të kthehemi në konsensusin e korrikut 2016", tha Manja. Sipas tij, opozita duhet të reflektojë sepse në të kundërt konsensusi i korrikut të 2016 do t'u duket dimër kur të ngrihen organet e reja të drejtësisë. "Ne po presim me qetësi që opozita të reflektojë për ta dhënë votën për Shkollën e Magjistraturës sepse nëse nuk e jep votën për Shkollën e Magjistraturës, ne do të presim me qetësi ngritjen e këshillave të reja që ka paracaktuar Kushtetuta dhe ligji", është shprehur Manja.