Rama: PD si ‘ Fronti i Lagjes’, vetingu ilaç për gjarpërinjtë
Basha: Kush i mban lidhur një trafikant me vëllain ministër
Kryeministri Edi Rama dhe kreu i opozitës, Lulzim Basha, janë thumbuar dje në distancë për procesin e vetingut. Rama ishte i pari që e quajti procesin e vetingut "si ilaç për gjarpërinjtë", ndërkohë që e krahasoi opozitën me "Frontin e dikurshëm demokratik të lagjeve", që ka dalë kundër këtij procesi.
Për Kryeministrin, në vend të letrave anonime, tashmë Partia Demokratike, sipas tij, nxjerr shpifjet dixhitale të ishKryeministrit Berisha. Rama e ka vijuar ironinë e tij me demokratët, duke thënë se janë bërë si "kënd i fletërrufeve". "Vetingu si ilaç gjarpërinjsh dhe opozita me libër shtëpie kundër vetingut si Fronti i dikurshëm Demokratik i lagjes! Në vend të Letrave Anonime janë shpifjet dixhitale të Saliut. Në vend të Këndit të Fletërrufeve janë recituesit e Lulit. Në vend të kryetarit është vetë Luli", shkruan Rama në statusin e tij në "Facebook".
KUNDËRPËRGJIGJA
Por kundërpërgjigja ndaj Edi Ramës erdhi pak minuta më vonë nga Lulzim Basha po në "Facebook". Kreu i PD- së ka publikuar një fotografi me një fole gjarpërinjsh, të cilët tha se ngjanin me qeverinë Rama e cila është e lidhur me trafikantët. Më tej, Basha i është përgjigjur po me ironi Kryeministrit, duke theksuar se fituesi i gjëegjëzës, që ai do tregonte do të fitonte një Toyota Yaris. "Gjëegjëzë Edvingu: Kush i lidh e i mban bashkë: Një trafikant të dënuar droge me vëllain ministër të Brendshëm PLUS një gjyqtar që e shpëton nga ekstradimi ortakun e trafikantit të drogës PLUS komision- erët e vetingut, që e shpallin këtë gjyqtar të përshtatshëm për të vazhduar detyrën?! Kush gjen përgjigjen e saktë, fiton Toyota Yaris", iu përgjigj po me ironi Basha në Facebook.
Edi Rama: Vetingu si ilaç gjarpërinjsh dhe opozita me libër shtëpie kundër vetingut si Fronti i dikurshëm Demokratik i lagjes!
PËRPLASJA
Rama dhe Basha u përplasën dhe dy ditë më parë, duke e quajtur njëri tjetrin si "oktapodi" që ka kapur sistemin e drejtësisë. Rama ka thënë se opozita ndryshe nga zgjedhësit e saj po sulmon procesin e vetingut. "Vetingu vijon të godasë me sukses në kokë oktapodin e korrupsionit degjenerues në drejtësi. Po për fatkeqësinë e zgjedhësve të saj që e mbështesin vetingun, njësoj si gjithë qytetarët, e për turpin e saj më të madh, opozita hidhet përpjetë pas çdo goditjeje. Humbës Pa Pikë Dinjiteti", ka thënë Rama. Ndërkohë që në replikë, Lulzim Basha ka thënë se Kryeministri është "koka e oktapodit të drejtësisë që po mbron dhe nuk po lejon ndëshkimin e politikanëve të korruptuar". "Edi Rama është Koka e Oktapodit të Drejtësisë që mbron dhe nuk ndëshkon politikanët e korruptuar e të lidhur me krimin. Për të mbrojtur Tahirin, Xhafën, Roshin, Frrokun, Dakon, Sejdinin, Ahmetajn dhe Gjiknurin me shokë, Edi Rama kapi Prokurorin e Përgjithshëm dhe zhduku Gjykatën Kushtetuese dhe Gjykatën e Lartë", ka thënë Basha.
Lulzim Basha: Kush i lidh e i mban bashkë: Një trafikant të dënuar droge me vëllain Ministër të Brendshëm PLUS një gjyqtar që e shpëton nga ekstradimi