Kërkohet zhbllokimi i llogarive të Çekajt e kamioni

Firma e transportit kërkon mjetin, i arrestuari paratë e bllokuara

Ndërkohë që Prokuroria e Krimeve të Rënda pret që të ekstradohet nga Gjermania Arbëri Çekaj, pronari i firmës që kishte porositur kontenierin me banane ku u kapën 613 kg kokainë, firma në fjalë kërkon zhbllokimin e llogarive bankare dhe të kamionit që po transportonte kontenierin nga Porti i Durrësit të magazinat e “Arbëri Garden”. Kërkesa është regjistruar në Gjykatën e Krimeve të Rënda pak ditë më parë dhe pritet që të shqyrtohet ditën e sotme në orën 13: 00 nga gjyqtarja Irena Gjoka. “Panorama” mëson se janë dy firmat “Arbëri Garden” dhe “Ecoalmax” që kërkojnë përmes përfaqësuesve të tyre ligjorë zhbllokimin e llogarive bankare dhe të kamionit. E para kërkon zhbllokimin e dy llogarive bankare të bllokuara nga Prokuroria e Krimeve të Rënda, konkretisht në vlerat 38 mijë euro dhe 10 milionë lekë. Këto llog- ari u bllokuan para katër muajsh në saj të hetimit pasuror për Arbër Çekajn, që rezulton administrator i firmës. Gjithashtu, u sekuestrua edhe kamioni që transportonte kontenierin dhe që drejtohej nga Armando Pezaku. Kamioni rezulton se është i firmës “Ecoalmax”, e cila kërkon zhbllokimin e tij, me arsyetimin e nuk i shërben më hetimit. Pronari i “Arbëri Gar- den” u vu nën akuzë për ngarkesën prej 613 kg kokainë që u kap më 28 shkurt në Maminas. Ai kishte porositur kontenierin me banane në Kolumbi, ku ishte fshehur droga. Për rastin, u arrestuan në flagrancë menaxheri i firmës “Arbëri Garden”, Donaldo Lushaj dhe shoferi i kamionit ku ndodhej kontenieri, Armando Pezaku. Kontenieri me drogë mbërriti në Portin e Durrësit më 19 shkurt të këtij viti. Dogana shqiptare pati sinjalizime nga autoritetet portuale të Livornos se kontenieri ishte i dyshimtë dhe me probleme. Për këtë arsye, autoritetet shqiptare vendosën që ta kontrollojnë dhe gjetën në pjesën fundore të tij pakot me kokainë. Pas kësaj, autoritetet së bashku me Prokurorinë e Krimeve të Rënda vendosën që të bënin dorëzimin e komanduar të ngarkesës për të mësuar destinacionin dhe porositësit. Agjenti doganor në Durrës telefonoi menaxherin e firmës që kishte porositur kontenierin, Donaldo Lushajn, duke e njoftuar se kishte hasur disa probleme. Ky i fundit është paraqitur në port dhe ka pranuar që të bëhen të gjitha procedurat e zhdoganimit. Pasi janë kryer këto të fundit, është lënë që kontenieri të tërhiqej për të mësuar destinacionin. Aty më pas ka ndërhyrë Policia duke kryer arrestimet.