Hyn në fuqi shtesa e re, sa do përfitojnë pensionistët

Hyn në fuqi buxheti i ndryshuar për pjesën e dytë të vitit. Fondet që do ndahen për pensionistët dhe sa është rritja për çdo kategori

Hyjnë në fuqi ndryshimet e buxhetit të vitit 2018, që anulon rritjen e pagave për administratën, ndërsa parashikohet një fond për shpërblimet e fundvitit për pensionistët.

Akti Normativ i Buxhetit u miratua dje në Fletoren Zyrtare, ndërsa me nisjen e sezonit të ri parlamentar do të miratohet edhe nga Kuvendi. Në Aktin Normativ që do t'i dërgohet për miratim në muajin shtator Kuvendit, qeveria ka anuluar rritjen e pagave, ku në buxhetin fillestar të miratuar ishte parashikuar fondi prej 10 milionë dollarësh. Përfitues të rritjes së pagave do të ishin punonjësit e arsimit dhe shëndetësisë. Rritja e pagave parashikohet të kryhet me buxhetin e vitit 2019. Nga ana tjetër, qeveria miratoi 30 milionë dollarë fondin për shpërblimet e pensionistëve me rastin e festave të fundvitit. Pensionistët parashikohet të përfitojnë 5 mijë lekë bonus me rastin e festave të fundvitit. Përfitues do të jenë 650 mijë pensionistë të ndarë në 6 kategori në të gjithë vendin. Po ashtu, me Aktin Normativ qeveria nuk ka shkurtuar fondin e investimeve publike. Akti Normativ do të sjellë shtim të fondeve të investimeve me 300 milionë lekë apo 3 milionë dollarë nga buxheti fillestar. Po ashtu me ndryshimet e buxhetit qeveria do të realizojë rialokime në investimet publike, pra, nga projektet që kanë pasur ecuri më të ngadaltë drejt atyre me ecuri më të shpejtë. Më herët, Ministria e Financave shpjegoi se nga ndryshimet e buxhetit, treguesit makroekonomikë dhe performanca e ekonomisë gjatë 6- mujorit është plotësisht në linjë me parashikimet fillestare dhe objektivat e buxhetit 2018. "Niveli i deficitit të përgjithshëm fiskal mbetet i pandryshuar në nivelin prej 2 për qind të Prodhimit të Brendshëm Bruto, sikurse ishte programuar në ligjin fillestar të buxhetit; Balanca primare pozitive mbahet e pan- dryshuar ( pra, me suficit), ekzaktësisht sa niveli i programuar në ligjin fillestar të buxhetit", sqaruan Financat.