KPK rrëzon DSIK për Malajn, 1 orë debat me përfaqësuesen e ONM
Komisioni i Pavarur i Kualifikimit vendosi të rrëzojë një raport negativ nga DSIK- u për gjyqtarin Artur Malaj, i cili aktualisht është pjesë e Gjykatës së Apelit Administrativ në Tiranë. Malaj, i cili ka qenë kryetar i Gjykatës së Vlorës, u përball ditën e djeshme me Komisionin e Pavarur të Kualifikimit. Në këtë seancë, DSIK- u kishte dërguar një raport negativ për gjyqtarin, ku thoshte se ai mund të jetë i përfshirë në afera korruptive si kryetar i Gjykatës së Vlorës. Komisioni i Pavarur i Kualifikimit tha dje se kishte tërhequr vendimet që përmendte DSIK- u dhe në bazë të hetimit administrativ të saj, rrëzoi raportin e DSIK- ut si të pabazuar në fakte dhe prova. Më pas, debati u zhvendos te pasuritë e gjyqtarit dhe pronat e kunatit dhe motrës së tij. Ka qenë një seancë që zgjati rreth dy orë, ku pjesën më të madhe e zuri debati me përfaqësuesen e ONM- së. Kjo e fundit ngriti pikëpyetje për blerjen e një apartamenti nga ana e gjyqtarit Malaj në Tiranë. "Ju keni porositur një apartament në Tiranë në vitin 2005, ndërkohë që jetonit dhe punonit në Vlorë. Apartamenti ka përfunduar në vitin 2008 dhe ju keni nisur të jetoni aty në vitin 2013. Pse ishit kaq i sigurt që do të transferoheshit në Tiranë?", pyeti përfaqësuesja e ONM- së. Gjyqtari Malaj tha se ishte i bindur që do ta transferonin, pasi kishte bërë kërkesë në KLD. Sa për apartamentin, ai tha se firma ndërtuese e kishte neglizhuar, pasi ai jetonte në Vlorë dhe e kishte lënë pasdore përfundimin e banesës së tij. Gjyqtari dha shpjegime edhe për blerjen e një prone nga ana e kunatit të tij dhe motrës te një shtetas me precedentë penalë, i dënuar për falsifikim dokumentesh. "Kur kanë blerë pronat, ata nuk më kanë kërkuar këshilla mua", tha gjyqtari.