Reagon Brukseli: Verifikime ligjit special për Teatrin
Komisioni u ka kërkuar autoriteteve shqiptare të ofrojnë informacion shtesë
Edhe Brukseli reagon për çështjen e Teatrit Kombëtar. Ndërsa në Tiranë vazhdon rezistenca për të mbrojtur godinën 80- vjeçare të Teatrit Kombëtar, e cila ka marrë një hov të ri dhe shpresë nga mosdekretimi i Ligjit të Posaçëm nga ana e Presidentit të Republikës, Ilir Meta, vjen edhe përgjigjja nga zyra e komisionerit për Zgjerimin, Johannes Hahn.
Ky i fundit i ka kërkuar drejtoreshës për Zgjerimin e Ballkanit Perëndimor në Komisionin e Zgjerimit, Genoveva Ruiz Calavera, t’i kthejë përgjigje letrës që Aleanca për Mbrojtjen e Teatrit Kombëtar i dërgoi rreth 20 ditë më parë. AMTK- ja ka vënë në dispozicion letrën, me kënaqësinë se “Zëri i artistëve dhe qytetarëve të Aleancës është dëgjuar edhe në Bruksel. Insistimi i vazhdueshëm i të gjithëve ka vlejtur. Tashmë Komisioni po merr në shqyrtim Ligjin Special dhe problemet e tij dhe pritet një opinion prej tyre. Aty propaganda për ‘ punë dhe jo llafe’ nuk vlen më”. Në letrën dërguar Aleancës, Calavera shprehet se ka ndjekur me vëmendje çështjen dhe u ka kërkuar autoriteteve shqiptare informacione shtesë në lidhje me Ligjin Special që parashikon ngritjen e një godine të re për Tetrin Kombëtar. Kjo letër vjen pas thirrjes që Aleanca për Mbrojtjen e Teatrit Kombëtar i ka bërë faktorit ndërkombëtar për të shfuqizuar ligjin, që i hap udhë shkatërrimit të Teatrit Kombëtar, për të ngritur në vend të tij një godinë të re me partneritet publik- privat. Pasi u kanë dërguar letra të hapura e peticione krerëve të shtetit shqiptar, Aleanca ka përcjellë shqetësimin e vet edhe te diplomacia europiane. Çështja e Teatrit u parashtrua përpara komisionerit për Zgjerimin, Johannes Hahn, përfaqësueses së BE- së për Çështjet e Jashtme, Federica Mogherini, dhe ambasadores së BEsë në Shqipëri, Romana Vlahutin, por edhe përfaqësive të tjera diplomatike në Tiranë. Një përfaqësi artistësh të Aleancës për Mbrojtjen e Teatrit u takua me përfaqësuesit e OSBE- së në Tiranë, ku u dorëzua informacioni me shkrim për shkeljet e ligjit, për shembjen e Teatrit, në lidhje me Marrëveshjen e Stabilizim- Asociimit dhe u dha një informacion për situatën aktuale në lidhje me protestën e Aleancës për mbrojtjen e Teatrit dhe impaktit të saj në publik.
LETRA Në letrën drejtuar diplomatëve, renditeshin shkeljet kushtetuese që shënoheshin me miratimin e Ligjit të Posaçëm, të miratuar në datën 5 korrik në Parlamentin shqiptar, si dhe mospërputhjen me kërkesat e Marrëveshjes së Stabilizim- Asociimit. Në fund të letrës drejtuar kryediplomatëve, thuhej se: “Si qytetarë të një vendi, që haptazi aspiron që të bëhet anëtar i Bashkimit Europian në një të ardhme shumë të afërt dhe të gëzojë të njëjtat të drejta ligjore demokratike, ju kërkojmë që kërkesa jonë të trajtohet si çdo kërkesë e qytetarëve europianë. Ne shpresojmë që Bashkimi Europian do të veprojë si një ruajtëse e demokracisë, rregullit dhe ligjit dhe t’u japë direktivat e duhura politikëbërësve shqiptarë, me qëllim që ligji të mund të shfuqizohet”. Kjo letër solli reagimin e znj. Vlahutin, e cila zhvilloi një takim me një përfaqësi të Aleancës, duke i siguruar se ky rast do të monitorohet hap pas hapi. Ndërkaq, në krahë të Aleancës dhe mbrojtjes së godinës së Teatrit Kombëtar kanë ardhur edhe dy organizata shumë të rëndësishme për mbrojtjen e trashëgimisë kulturore, që janë DOCOMOMO dhe “Europa Nostra”. Me sa duket, ky interesim i ndërkombëtarëve dhe rezistenca gjashtëmujore e Aleancës për Mbrojtjen e TK- së e inkurajoi Presidentin Meta të kthejë mbrapsht Ligjin e 5 korrikut.