Trump sulmon hetimet e prokurorit Mueller
“Bashkëpunimi i fshehtë s’quhet krim, unë s’kam bashkëpunuar”
Presidenti amerikan Donald Trump po sulmon pa pushim hetimet e prokurorit të posaçëm, Robert Mueller, i cili po “gërmon” mbi lidhjet e dyshuara midis fushatës së tij presidenciale të vitit 2016 dhe Rusisë. Pas deklaratës së avokatit të tij Rudy Giuliani një ditë më parë, se bashkëpunimi nuk quhet krim, edhe Trump ka shkruar të martën në “Twitter” se “një bashkëpunim i fshehtë nuk përbën krim”. Por Trump shtoi se kjo gjithsesi nuk ka rëndësi, sepse fushata e tij nuk ka bashkëpunuar fshehurazi me Rusinë. Analistët ligjorë në SHBA besojnë se, edhe pse bash- këpunimi i fshehtë mund të mos jetë krim, Mueller ka mundësi që të jetë duke hetuar rreth një komploti të mundshëm, që në vetvete përbën vepër penale, për t’u lidhur me një qeveri të huaj me synimin që të ndikohej në zgjedhje. Sipas tyre, ka gjithashtu mundësi që ai të jetë duke hetuar rreth lidhjeve të shum- ta që ndihmësit e zotit Trump mendohet se kanë pasur me interesat ruse. Trump e ka quajtur hetimin një “gjueti shtrigash”, që sipas tij po përdoret nga kundërshtarët e tij politikë në përpjekje për të shpjeguar mundjen e ish- kandidates demokrate, Hillary Clinton. Por ndërkohë, ish- kryetari i fushatës së Presidentit Donald Trump doli sot në gjyq në Aleksandria të Virxhinias, për një nga dy çështjet penale që u paraqitën kundër tij nga Prokurori i Posaçëm, Robert Mueller. Paul Manafort është i pari mes ish- këshilltarëve të Presidentit Trump që del në gjyq, nën akuzat për mashtri- me bankare dhe me taksat nga hetuesit federalë, që po shqyrtojnë ndërhyrjen ruse në zgjedhjet presidenciale të vitit 2016. Manafort kishte qenë nën hetim federal që nga viti 2014 mbi dyshime për lobim të paligjshëm dhe mashtrime fi- nanciare. Por vitin e kaluar ai u përfshi në hetimin e Rusisë, pasi zoti Mueller filloi të analizonte lidhjet mes anëtarëve të fushatës së zotit Trump dhe Rusisë. Prej 14 muajsh, zoti Muller ka mbledhur prova për çështjen kundër Manafort.