Rikonstruktohet Dispanseria, Manastirliu: U shërben 40 mijë pacientëve
Klinika e specializuar për sëmundjet e mushkërive në Tiranë ku trajtohen pacientë nga i gjithë vendi ka nisur rikonstruktimin. Ministrja e Shëndetësisë dhe e Mbrojtjes Sociale ishte një ditë më parë atje për të ndjekur nga afër punimet dhe lajmëroi investime në plot 16 qendra të reja shëndetësore në Tiranë dhe në total rreth 80 të tilla në të gjithë vendin. “Kemi hapur investime madhore në shëndetësi dhe padyshim programi kombëtar për rindërtimin e 80 qendrave shëndetësore është ndër më të rëndësishmit që ka nisur e zbatohet këtë vit. Pjesë e këtij programi është investimi te Dispanseria, e cila do të rindërtohet dhe do të pajiset me aparatura moderne për t’ju shërbyer rreth 40 mijë pacientëve që marrin shërbim të specializuar në këtë qendër”, nënvizoi ministrja, duke deklaruar se vetëm investimi te Dispanseria ka një kosto rreth 60 milionë, që përfshin punime jo vetëm në infrastrukturë, por dhe një pajisje bio- mjekësore të teknologjisë së lartë.
Fluksi që përballon klinika për sëmundjet e mushkërive është shumë i lartë e për këtë arsye rikonstruksioni i saj ka qenë domosdoshmëri. Deri në përfundimin e punimeve, qytetarët duhet t’i drejtohen Poliklinikës nr. 3 për të marrë shërbimet. Ministria e Shëndetësisë po investon për fuqizimin e kujdesit parësor, ndërsa ka nisur programin kombëtar të rehabilitimit të 300 qendrave shëndetësore. Përpos kësaj, tre projekte madhore nisin këtë vit në QSUT. Ndërtimi i spitalit të ri të sëmundjeve të brendshme që do të zëvendësojë 6- katëshin ekzistues; ndërtimi dhe pajisja e dy kateve të Kirurgjisë së Përgjithshme dhe Pediatria e re moderne.