VENDIMI I QEVERISE
Legalizimet e pronat, skemë e re për tapitë
Qeveria vendos të ndryshojë të gjithë aplikimin për regjistrimin e lejeve të legalizimit dhe kompensimin e pronave. Lehtësitë e reja
Duhet të marrësh kompensimin e pronës së zënë, por ke probleme me hartat, ke mbyllur legalizimin, por nuk merr dot tapinë në Hipotekë
Të gjitha këto përplasje mes institucioneve pritet të marrin zgjidhje me reformën e re, që bashkon në një tre institucionet që japin tituj pronësie. Agjencia e Trajtimit të Pronave, Agjencia e Legalizimeve dhe Hipoteka do të funksionojnë si një institucion i vetëm. Zgjidhja për qytetarët është e qartë. Të gjithë dokumentacionin që duhet të merrnin vetë në këto institucione, apo edhe në institucione të tjera, do të gjenerohet nga vetë agjencia e re. Projekti i qeverisë, i cili është në fazën finale, do të miratohet në shtator, duke mbyllur kështu një ndër përplasjet më të mëdha që nga fillimi i demokracisë. SI DO FUNKSIONOJË Ishte kreu i ALUZINI- t ai që sqaroi në një prononcim se me çfarë do të merret agjencia e re. “Unifikimi i institucioneve është në fazën e vet finale që do të thotë, që me hapjen e sezonit të ri parlamentar kalojmë fillimisht në qeveri, pastaj në Parlament legjislacionin për trajtimin e të gjitha proceseve tranzitore të pronësisë që ne duhet t’i mby- llim. Imagjinoni, kemi filluar ta ndajmë tokën me Ligjin 7501 në vitin 1991 dhe pas 27 vjetësh, ne akoma ndajmë toka në fshat. Kemi filluar të bëjmë legalizimet në vitin 2005 dhe ende bëjmë legalizime. Kemi filluar të kthejmë prona në vitin 1993 dhe kthejmë akoma prona. Të gjitha këto procese tranzitore duhen mbyllur dhe duhen regjistruar në një hartë të unifikuar”. Një zgjidhje që do jepet për legalizimin, është marrja e hipotekës. Vetë Lame është ankuar disa herë në media, se pavarësisht lejes së legalizimit, përplasjet me dokumentacionin në Hipotekë zvarritin dhënien e tapisë. Në fillim të vitit, qeveria miratoi një vendim që kushtëzonte Hipotekën, që brenda 5 ditësh të jepte përgjigje për tapinë e legalizimit. Unifikimi i dy institucioneve pritet të sqarojë procedurat. Aplikimi me një sportel, do të thotë që qytetarët do marrin tapinë me një procedurë dhe jo duke u zvarritur në disa dyer të administratës. KOMPENSIMI I
PRONAVE Listat e pronarëve që kanë njohur të drejtën e kompensimit të pronave, kanë arritur deri në vitin 2000. Janë mbi 24 mijë vendime njohjeje kompensimi. Problemi është se pronarëve, edhe pse i njihet toka e zënë, është harta ajo që i pengon. Kaosi në Hipotekë ka sjellë me mijëra raste mbivendosjesh. Në kushtet për të marrë kompensimin e pronës, është: “Konfirmim nga ZVRPP përkatëse mbi gjendjen juridike të pronës qe kompensohet dhe nëse është ushtruar apo jo e drejta e parablerjes”. Kjo procedurë do të kryhet nga vetë agjencia e re. Një kusht tjetër është: Vërtetim nëse subjektet ( secili prej trashëgimtareve) kanë përfituar apo jo nga dispozitat për ndarjen e tokës bujqësore ( Ky vërtetim merret në DAMT/ Këshilli i Qarkut/ Njësia Administrative, ne atë vendbanim ku trashëgimtari ka banuar deri në vitin ‘ 91). Edhe kjo procedurë do të kryhet nga agjencia e re që do krijohet. Kjo e bën procesin e kompensimit më të thjeshtë. Përplasja e hartave me ALUIZNI- n, ATP- në dhe Hipotekën dhe të gjitha problemet, që lindin nga kjo përplasje, do të zgjidhen në një zyrë të vetme. ÇFARË THA RAMA “Kjo reformë do të jetë rrënjësore, do të racionalizojë burimet njerëzore që kemi në dispozicion në këto institucione, do të mundësojë një ecuri shumë më të shpejtë dhe efikase të modernizmit të brendshëm të këtyre institucioneve, do të krijojë brenda këtij institucioni të ri një strukturë apeli, në mënyrë që qytetarët të mos jenë të detyruar të shkojnë menjëherë në gjykatë, por të kenë mundësi ta apelojnë brendapërbrenda institucionit, në një strukturë që është autonome, një lloj avokati i qytetarit në institucion, që do të ulë në mënyrë drastike kohën, mundimet dhe mbi të gjitha do të ulë në mënyrë drastike të gjithë atë dëshpërim, që krijohet kur je i detyruar të shkosh në gjykatë për diçka që e di që ke të drejtë. E mbase, më e rëndësishmja, do të arrijmë që në fund të mandatit të kemi një lehtësi, shpejtësi dhe transparencë shumë më të madhe në dhënien e titujve të pronësisë, përmes edhe një programi special digjitalizimi”.