Prokurorja e Tahirit, në krye të Prokurorisë Tiranë
Imeraj kërkoi arrestimin e ish- ministrit, ka dosjen “Shullazi”
Kryeprokurorja Arta Marku ka vendosur të komandojë në krye të Prokurorisë së Tiranës prokuroren e Krimeve të Rënda, Elisabeta Imerajn.
Vendimi është marrë pas shkarkimit të Dritan Rreshkës, i cili ishte komanduar në krye të kësaj prokurorie nga Kryeprokurorja e përkohshme. Rreshka, me një karrierë të gjatë në organin e akuzës, u shkarkua me vendim të Komisionit të Pavarur të Kualifikimit për shkak të problemeve me pasurinë. Për këtë arsye, lindi nevoja që Marku të komandonte dikë tjetër në krye të Prokurorisë së Tiranës. Imeraj ka një karrierë të gjatë gjithashtu në organin e akuzës. Ajo u vu në qendër të vëmendjes vitin që shkoi, kur së bashku me prokurorët Besim Hajdar- mataj dhe Gentjan Osmani, kërkuan autorizim nga Kuvendi për arrestimin e ish- ministrit të Brendshëm, Saimir Tahiri. Imeraj ka qenë edhe pjesë e hetimeve, sidomos në dosjen e “Sota”, ku u sekuestruan 863 mijë euro që dyshohen se kishin lidhje me aktivitete të jashtëligjshme të ish- ministrit të Brendshëm, Saimir Tahiri. Gjithashtu, Imeraj ka qenë prokurore e çështjes së korrupsionit në burgje, ku të pandehur ishin ish- drejtori i Burgjeve Artur Zoto dhe vartësi i tij, Iljaz Labi. Një çështje mjaft të rëndësishme që Imeraj ka në dorë është ajo e Shullazit dhe bandës së tij. Çështja është në fazën e dhënies së pretencës, pasi shqyrtimi gjyqësor është mbyllur. Kjo bën që Imeraj të largohet nga çështja për të drejtuar Prokurorinë e Tiranës. Kështu, pa mbushur ende një vit, Imeraj bëhet drejtuesi i tretë i Prokurorisë së Tiranës. Kujtojmë se në fillim të vitit u shkarkua Petrit Fusha me urdhër të Arta Markut dhe vendin e tij e zuri Dritan Rreshka. Por rrugëtimi i tij ka zgjatur vetëm pak muaj, pasi Komisioni i Pavarur i Kualifikimit vendosi ta shkarkojë Rreshkën për pasuri të pajustifikuar. SHKARKIMI I RRESHKËS ILDKPKI kishte dalë në përfundimin se Rreshka kishte fshehur pasurinë. Hetimi administrativ i thelluar për Rreshkën u përqendrua mbi kriterin e pasurisë, që përfshiu një shtëpi katërkatëshe të ngritur mbi “Qytetin Studenti” në Tiranë në vitet 20032004, bono thesari me vlerë 7.9 milionë lekë dhe të ardhurat nga qiratë dhe emigracio- ni në vlerat 2.8 milionë lekë. Rreshka u pyet pikërisht për këto pasuri nga trupa gjykuese e përbërë nga Valbona Sanxhaktari, Etleda Çiftja dhe Xhensila Pine. Lidhur me kursimet dhe pasurinë, Rreshka tha se kishte nisur punë që në vitet ‘ 94-‘ 95 në Greqi, kur ishte gjimnazist. Ai madje ishte shkëputur nga universiteti edhe gjatë vitit 1998 për të punuar në Greqi, ku ka arritur të kursejë 2.8 milionë lekë nga puna në turizëm. Rreshka shpjegoi edhe ndërtimin e godinës katërkatëshe. Prokurori shpjegoi se në vitin 2000 me kursimet nga emigracioni – kur ishte akoma student,- kishte blerë një truall 293 m2, mbi godinën nr 19 me vlerë 800,000 lekë.