Denoncimi i Shehut: Ka një fushatë, që nderon diktatorin Hoxha
Deputeti i Partisë Demokratike, Tritan Shehu, ka denoncuar atë që e konsideron si fushatë të dirigjuar për rivendosjen në piedestal të ishdiktatorit Enver Hoxha. Përmes një reagimi në profilin e tij në “Facebook”, Shehu kujton se shumë vepra të ish- diktatorit Hoxha, filma të realizuar gjatë regjimit komunist, por edhe ishanëtarë të Byrosë Politike, kanë nisur të shfaqen në ekrane dhe po marrin vëmendje mediatike. “Prej disa kohësh ka filluar nëpërmjet disa mediave televizive e të shkruara, përfshi dhe TVSh, një “fushatë” si e dirigjuar për rivendosjen në piedestal të Enver Hoxhës, “veprave” të tij, shumë qëndrimeve të atij regjimi, të lidhura këto me periudhën e Luftës Antifashiste dhe me atë të diktaturës mbas saj. Për këtë, hapësira të mëdha po u vihen në dispozicion filmave, ish- anëtarëve të Byrosë Politike, që përbënin kupolën kriminale të atij regjimi, ishdrejtuesve të lartë të tij etj., të cilët në tërësi vetëm i thurin lavde të kaluarës, pa bërë analiza realiste. Gjykoj se kjo është jo vetëm një “fushatë” e padrejtë, e pamoralshme, por dhe provokative, e rrezikshme për të ardhmen e vendit, demokracinë, integrimin e paqen tonë sociale”, shkruan Shehu. Sipas nënkryetarit të Komisionit të Jashtëm në Kuvend, në shkelje të ligjeve ekzistuese dhe në fyerje të vuajtjeve tragjike që shqiptarët kanë pësuar nga regjimi komunist, kronikat që transmetohen po vënë në pah ‘ ndjenjat patriotike’ të diktatorit Hoxha. “Veçanërisht kërkohen të vihen në pah gjoja “ndjenjat patriotike” të diktatorit, “dashuria” për njerëzit, “fitoret” etj., marrëzira të tilla, duke mos thënë asnjë fjalë për të vërtetën, që ai si person e regjimi i tij ishin ndër faktorët më antikombëtarë, antinjerëzorë e shkatërrues, që Shqipëria ka njohur në historinë e saj. Dhe kjo bëhet qartësisht edhe në shkelje të ligjeve tona ekzistuese, të konventave që kemi ratifikuar, në fyerje të gjenocidit e vuajtjeve tragjike, që ai diktator e diktatura e tij i krijuan këtij populli e vendi. Le të supozojmë për një çast se çfarë do të ndodhte p. sh. në Gjermani apo Itali n. q. s do të publikoheshin të tilla materiale për Hitlerin a Musolinin, apo qoftë edhe në Rumani n. q. s do ndodhte kjo rreth Causheskut?!”, thekson deputeti i PD- së.